Lafaek News—Eligio Moniz do Rego, ofisialmente husik ona kargu nudar jeneral Manajer iha media online Lafaek News, hodi assume hikas kna’ar foun nudar adjunto diretór TIK-Timor iha palasiu governu.
Eis Jeneral Manajer Lafaek News, Eligio Moniz do Rego, hetan nomesaun hosi fundasaun Lafaek News, iha loron 11 fulan Janeiru 2023 no remata iha 11/01/2024.https://www.lafaeknews.tl/fundasaun-ln-nomeia-eligio-ezerse-simu-knaar-jnuudar-jeneral-manajer/
Diretór ezekutivu media Lafaek News, Agapito de Deus hatoo apresiasaun boot ba eis Jeneral Manajer Eligio do Rego ne’ebé esforsu halo mudansa signifikativu durante mandatu husi periodu 2023 too remata iha tinan ne’e.
“Ha’u agradese tebes ba maun Eligio ne’ebé ho integridade boot servisu voluntáriu durante tinan ida konsege halo mudansa lubun ba Lafaek News, felizmente maun Eligio nia kna’ar hanesan jeneral manajer hotu ona no nia tenke simu fali kna’ar foun iha TIK Timor hodi apoiu IX governu konstitusional durante tinan 5,” Diretor Lafaek news hatoo lia hirak ne’e iha nia kna’ar fatin Lafaek News Kuluhun Dili, tersa (13/02/2024).
Jestór Lafaek News ne’e afirma tan, kona-ba jeneral manajer foun, sei planu hela atu nomea fali ema ne’ebé ho koñesimentu kle’an iha area manajementu nian atu bele subtitui hikas eis Jeneral Manajer Eligio do Rego nia fatin hodi kontinua halo servisu iha intituisaun media refere.
“Ha’u sei planu hela, maibé iha tempu badak ha’u sei nomea fali ema ida hosi Lafaek News nian duni atu bele troka fali maun Eligio nia fatin hodi kontinua servisu ba media ne’e,” Agapito haktuir.
Ekipa Kobertura : Lafaek News
