Lafaek News_Komisaun Funsaun Públika (KFP) hamutuk ho Provedór Direitus Umanus no Justisa, Inspetór Jerál Estadu no Komisaun Anti-Korupsaun anunsia ona mudansa ba kalendáriu komemorasaun Loron Nasionál Funsaun Públika. Selebrasaun ne’e monu iha loron 15 jullu 2026, adia ba fali loron 25 setembru 2026 no sei hala’o iha Gleno.
Anúnsia ne’e hato’o husi instituisaun Provedoria Direitus Umanus no Justisa PDHJ, Komisaun Funsaun Públika KFP, Inspekasaun Jerál Estadu IJE, no Komisaun Anti-Korrupsaun KAK iha Konferénsia Imprensa iha Edifísiu KFP, Caicoli, Dili, iha loron 14 jullu 2026.
Providor Direitus Umanus no Justisa, Virgilio da Silva Guterres “Lamukan” hateten loron nasionál Funsaun Públika selebra kada tinan iha loron 15 de Jullu, ne’ebé monu ba aban. Maibé ba tinan ne’e, komemorasaun koletiva ka eventu públiku sei la realiza iha loron ne’e. Tuir desizaun husi entidade 4 ne’e iha semana kotuk, eventu kulminante ba komemorasaun sei adia ba loron 25 de Setembru iha Gleno.
“Iha razaun 2 prinsipál ba alterasaun ne’e mak períodu preparasaun tuir ho deklarasaun lutu nasionál ba mate husi Eis Prezidente Repúblika Dr. Francisco Guterres Lú Olo. Durante semana ida nia laran labele organiza atividade desportivu no atividade seluk ne’ebé planu ona,”PDHJ ba jornalista sira liu husi konferensia imprensa iha sala enkontru KFP Caicoli, Dili.
Nia haktuir, iha tempu badak, hahú 4 to’o 10 setembru, entidade relevante sira sei foku ba preparasaun no selebrasaun atu simu Urna Amu Bispu Dom Jaime, ne’ebé mai husi li’ur.
“ami deside adia loron komemorasaun públiku ba 25 de Setembru. Ida ne’e atu fó espasu ba komisaun organizadora atu prepara didi’ak, inklui eventu desportivu no konkorrénsia ba grupu korais sira,” dehan reprezentante sira.
Providor Lamukan mós husu ba funsionáriu públiku hotu atu aproveita loron ne’e hodi hanoin fali kompromisu profisionál ne’ebé simu iha momentu juramentu no tomada de pose. Mensajen ne’e foku ba dedikasaun, abnegasaun no espíritu serbisu ne’ebé marka funsaun públika nian.
“Importante mak iha loron 15 jullu ne’e ita hotu halo refleksaun institusionál no pesoál. Reflete fila-fali saida mak ita halo ona ba administrasaun públika atu servi ita-nia sidadaun sira,” Nia dehan
Maski eventu públiku adia, PDHJ ba instituisaun públiku hotu atu kontinua selebra Loron Nasionál Funsaun Públika iha loron 15 jullu ne’e tuir kapasidade ida-idak nian no bele halo limpeza jerál, partisipa misa, ka vizita Jardim dos Heróis.
Jornalista estajiada: Marciana Mesquita/ Rojita da Silva
Editora: Gracia Soares
