Lafaek News—Mata Dalan Institutu (MDI) lansa Planu Estratéjiku foun ba períodu 2026–2030, ho objetivu atu hametin dezenvolvimentu institusionál no promove hanoin krítiku atu aumenta kontribuisaun ba prosesu foti desizaun públika, liu-liu iha kontestu integrasaun rejionál no adezaun Timor-Leste ba ASEAN.
Diretór MDI Estevanus Coli hateten, MDI lansa planu estratéjiku 2026-2030 ne’e sai etapa importante ida ba instituisaun ne’ebé hala’o ona nia atividade dezenvolvimentu durante tinan 21.
“Planu estratéjiku foun ne’e iha pilar prinsipál tolu, mak hametin dezenvolvimentu institusionál, hametin MDI nia papél nu’udar instituisaun ne’ebé promove hanoin krítiku, no uza hanoin krítiku nu’udar plataforma atu apoia prosesu integrasaun rejionál, liu-liu iha kontestu Timor-Leste nia adezaun ba ASEAN, tan ne’e, MDI sei kontinua kolabora no fó apoiu ba komunidade sira atu fasilita partisipa ho ativu iha prosesu dezenvolvimentu.dehan Diretór MDI Estevanus Coli ba jornalista iha Tower Fatuhada, Kinta 15/10/2026/.
Nia haktuir MDI konsidera nia-an nu’udar parseiru ida ba Governu, ne’ebé kontribui ba prosesu dezenvolvimentu liuhosi análize kritika no fornese dadus no informasaun kredível ba Governu no instituisaun Estadu sira. Informasaun hirak-ne’e bele sai nu’udar referénsia importante ba prosesu foti desizaun.
Tanba Durante tinan 21 nia laran, MDI hala’o ona atividade no programa oi-oin atu apoia komunidade sira, inklui promove utilizasaun rai ne’ebé di’ak, hametin servisu no ekonomia lokál, no enkoraja komunidade atu partisipa ho ativu iha prosesu dezenvolvimentu.
Diretór ne’e akresenta MDI mós iha kooperasaun ho Governu, liu hosi Ministériu Administrasaun Estatál no ministériu sira seluk, iha implementasaun Programa Nasionál Dezenvolvimentu Suku (PNDS).
“Kooperasaun ne’e importante tanba ajuda MDI no instituisaun governamentál sira komprende dezafiu no difikuldade ne’ebé mosu durante implementasaun programa sira. Ho kolaborasaun ne’ebé di’ak, instituisaun sira bele servisu hamutuk no fó kontribuisaun ba prosesu foti desizaun.
Durante períodu ne’ebé liu ba, MDI kontinua fó apoiu ba Governu, maski iha mudansa lideransa no polítika governamentál. MDI mós konsidera katak mudansa no ajustamentu ba diploma legál sira ne’ebé regula PNDS no dezenvolvimentu lokál importante atu garante dezenvolvimentu sustentável ba komunidade sira.
Iha prosesu dezenvolvimentu lokál, MDI kontinua apoia komunidade sira atu hetan asesu ba uma ne’ebé seguru no adekuadu, hodi bele moris ho dignidade. Maski iha mudansa iha programa no prosesu implementasaun, MDI reafirma kompromisu atu kontinua kolabora no fó apoiu ba komunidade sira, ho tekonolojia ida ne’e MDI mós haree katak utilizasaun plataforma dijitál bele sai instrumentu importante atu fasilita servisu públiku, hadi’a asesu ba informasaun no hametin prosesu dezenvolvimentu iha Timor-Leste.
Entretantu Ho Planu Estratéjiku foun ba períodu 2026–2030, MDI iha espetativa atu kontinua hametin nia kapasidade institusionál, aumenta kooperasaun ho Governu no komunidade sira, no kontribui ba prosesu dezenvolvimentu ne’ebé transparente, inkluzivu no sustentável.
Jornalista: Moises Guterres
