Lafaek News—Fundasaun Lafaek News Lda, kuarta 11/01/2023 ofisialmente nomeia Eligio Moniz do Rego, atual vise Prezidente ICT-TL, simu kna’ar foun nu’udar Jeneral Manajer ho periodu mandatu husi tinan 2023-2024 iha instituisaun media online lafaek news.
Iha ámbitu nomeasaun fundador nain tolu kompostu husi Agapito de Deus, Acacio Pinto no Floriano Soares, entrega kedan karta kompeténsia nu’udar baze fundamental ba jeneral manajer (JM) hodi hala’o servisu ho kompeténsia absoluta tuir kapasidade ne’ebé JM iha.
Iha nomeasaun ne’e, Diretor ezekutivu lafaek news, Floriano Soares hateten, razaun fundamental fundasaun lafaek news Lda eskoila Eligio Moniz do Rego nu’udar Jeneral Manajer ho periodu tinan ida nia laran, tanba nia ema ida ne’ebé iha potensialidade iha area ICT atu bele tulun oinsá projeta liután ezisténsia instituisaun lafaek news hahú husi ohin ba futuru.
“Razaun Lafaek news eziste kuaze tinan tolu ona iha dezembru agora ne’e ba tinan tolu resin ona, entaun ita presiza media iha Timor Leste tenke avansa liután no dezenvolve di’ak entaun ida ne’e mak ita presiza ema ne’ebé iha kapasidade atu jere atu sai administrasaun di’ak, oinsá maka halo jestaun di’ak iha media lafaek news” Diretor ezekutivu Lafaek news, Floriano Soares, iha nia knaar fatin Bidau Lesidere Dili, kuarta (11/01/2023)
Diretor lafaek news ne’e afirma, nia parte rekoñese durante ezisténsia lafaek news, jere direta husi media nain sira ne’ebé iha de’it koñesimentu natoon liu-liu iha parte redasaun no iha mos difikuldade balun hanesan oinsá halo manajementu nian, tan ne’e presiza duni Timor-oan ida espertu iha manajementu no jestaun hodi projeta lafaek news ba oin.
“Tanba durante ne’e ita hanesan jornalista ita seidauk iha koñesementu liga ho jestaun iha instituisaun, entaun ba instituisaun ne’e presiza ema ne’ebe iha kapasidade di’ak atu jere ida ne’e,” katak Floriano Soares.
Sorin seluk, atual Vise Prezidente ICT-TL, Eligio Moniz do Rego, haktuir nia parte sente orgulhu ba konfiansa tomak husi fundasaun Lafaek News Lda, ne’ebé fo ona kna’ar foun sai jeneral manajer ba lafaek news.
“Senti orgulhu tebes ho kna’ar foun ne’ebe fo mai ha’u ne’e liu-liu iha area jornalismu nian, ha’u pesoal kontenti tanba kolega sira fó ona fiar bo’ot ida ho responsabilidade ida ne’ebé ke bot tebes, no ha’u garante katak fiar ne’ebé fo mai ha’u sei tane ho diak no la halo kolega sira desapontado ka la satisfeitu ho rezultadu serbisu iha oin, no ha’u mos garante ita sei servisu hamutuk hodi hadia fila fali saida mak presija ita atu hadia. Hau mai hamutuk ho Lafaek News la iha intensaun ka hanoin atu kompete ho sira seluk, maibe atu kompleta malu no suporta malu hodi halo buat foun iha mundu jurnalismu online Timor-Leste ho kbi’it ne’ebe hau bele” katak Eligio.
Jeneral manajer lafaek news ne’e esklarese, prioridade servisu ba tinan ida ne’e hadia jestaun no estrutura ne’ebé iha hodi dezeñu plataforma programa ba estastistika ho natureza kurtu prazu no longu prazu nian.
“Iha prioridade ha’u nia mandatu ne’e mai uluk nanain ha’u sei hadia fila-fali jestaun ne’ebé iha estrutura laran inklui koordenasaun, sei dezeñu fila-fali forma foun, alende ne’e mós sei halo planu estratéjia longu prazu no kurtu prazu no mós iha tan planu sira seluk, ha’u sei mantein atu nafatin kolabora hamutuk no parseirus sira ne’ebe durante ne’e halo ona kooperasaun ho lafaek news, no sei hametin liután kolaborasaun ho parseiru sira iha futuru, no sei implementa mos planu foun, idea foun, hanoin foun no vizaun foun hodi bele atinji tarjetu serbisu durante tinan ida nia laran” dehan JM ne’e.
Iha fatin xefe Redasaun Lafaek News Acacio Pinto, reforsa hanesan xefe Redasaun sente orgullu ba desizaun ida ne’e, tanba tékniku Timor-oan ida ne’ebé iha potensial no nu’udar vise Presidente téniku iha Timor Leste, bele modifika media Timor nia produtu Jornalístiku nune’e media Internasional bele hatene Informasaun Timor, tanba durante Jornalista Timor oan hakerek iha Tetun barak liu, maibé Google Translate seidauk rekuinese so rekuinese Lingua Inglesh ho Portugés de’it, maibe iha media nasaun seluk sira nia lian nasional ema bele halo ona tradusaun iha Google Translate maske iha Timor iha ona plataforma Website Tradusaun Tetun ba Ingles no portugésa, maibé seidauk define tanba Tetun seidauk ejiste iha Google.
” Hau hanoin Maun Elidio hanesan IT Timor oan ida nia iha kapasidade atu bele muda plataforma Website Lafaek news nian ba standar Internasional atu iha futuru Google Translate rekuinese tetun karik produtu jornalistiku Timor oan nia mos ema iha mundo bele komprende, ami hanesan redasaun nia mós halo nia kompetensia atu hanesan ohin diretor dehan katak nia sei halo nia kna’ar halo manajementu ba lafaek news fatin hanesan oinsá atu bele valoriza di’ak liután servisu jornalista ninian liu-liu hakerek notisia oinsá mundu bele rekoñese produtu jornalistiku ninian,” Acacio Pinto hateten.
Eis fotograper Timor Post ne’e mos fundamenta, iha Timor Leste presiza dezenvolve media online sira no kompleta mós ba média ne’ebé sai dizitalizadu no Timor Leste tenké iha media ida ne’ebé dizitalizadu kualidade di’ak hodi kompete ho media internasionál
“Ita hotu hatene katak Timor leste presiza dezenvolve mós media media online sira tenke kompete ho media dizitalizadu sira, Timor Leste presiza iha media ida ne’ebé maka tenke iha dizital di’ak kualidade di’ak atu kompete ho media internasionál” hakotu nia
Jornalista : Aniceto Dias
Editor : Agapito de Deus
