Lafaek News—Primeiru Ministru Jenerál Taur Matan Ruak, kompremete governu sei tulun populasaun sira ne’ebé enfrenta dezastre natureza his period fulan Dezembru 2022 no fulan Janeiru 2023.
Taur relata populasaun uma kain kuaze 360 mak afeta dezastre natureza hanesan rai hanehan uma, anin sibu uma inklui eskola 10 iha fulan Dezembru ho fulan Janeiru 2023 nian.
“Ami ko’alia kona-ba dezastre sira ne’ebé afeta ita nia populasaun, kuaze ita nia populasaun família 360 liu mak afeta ba dezastre ne’e iha Timor laran tomak balun rai monu, ahi han uma, balu anin mak sobu, inklui ita nia eskola sanulu liu”, deklara Primeiru Ministru Jenerál Taur Matan Ruak hafoin hala’o enkontru semanal ho Prezidente Repúblika José Ramos-Horta iha Palásiu Prezidensiál Kinta (12/01/2023).
Tuir Xefe Governu argumenta, oras ne’e da-daun governu servisu makas loos hodi bele tau matan ba populasaun afetadu hirak ne’e iha territoriu nasional.
“Ita kompara ho 2020, 2021 ne’e menus loos maibé ne’e ita nia familia inan aman sira afetadu, ne’e mak ita buka dalan atu ajuda sira hodi minimiza hodi hamenus todan ne’ebé sira hetan durante iha fulan Dezembru no Janeiru nia laran”, deklara PM Taur.
Entretantu iha enkontru entre Xefe Estadu no Xefe Governu ne’e toka mos asuntu seguransa, PR no PM preokupa ho akontesimentu hirak ne’e husu atu garante paz harmonia iha rai Timor Leste, tanba Ministériu Interiór, governu, enjeral liu-liu Ministériu Interiór partikulár PNTL servisu makas loos hodi buka tuir autor sira ne’e.
Jornalista : Rita Moniz
Editór : Agapito de Deus
