Lafaek News_Kuarta feira, 22 Jullu 2026 Sekretaria Estadu Asuntu Toponímia no Organizasaun Urbana (SEATOU) lidera ona formasaun ekipa konjunta hodi halo operasaun iha tempu badak hodi kontrola no asegura funsionamentu padraun legál iha Sidade Dili.
Tuir Sekretáriu Estadu SEATOU, Germano Santa Brites, ekipa ne’e kria atu regula sidadaun iha kapital atu uza espasu públiku tuir regra ne’ebé estabelese ona.
“Objetivu maka atu organiza Sidade no tau ordem públika nune’e sosiedade bele moris tuir regra,”SEATOU Germano ba jornalista sira liu husi konferénsia imprensa iha salaun enkontru MAE, Caicoli, Dili.
Germano informa katak iha semana ida-ne’e, ekipa sei hahú identifika fatin iha área Cristo Rei. Koordenasaun ho DNTT no Prezidente Autoridade Munisípiu Dili sei tau besi manuais iha estrada atu asegura movimentu ba área refere.
Operasaun ofisiál sei lansa iha loron 1 Agostu 2026 hodi sensibiliza públiku kona-ba uza espasu públiku tuir lei.
Operasaun ne’e bazeia ba diploma legál hirak tuir mai:
1. Dekretu Lei 03/2024 – “Higiene no Ordem Públika”
2. Dekretu Lei N.º 33/2025 – “Regime das Zonas de Estacionamento de Duração Limitada”
3. Lei N.º 1/2025 – “Medidas de Tutela da Legalidade Urbanística”
4. Dekretu Lei nº 6/2003 – “Kódigu de Estrada”
5. Dekretu Lei N.º 9/2022 – “Regime jurídico da edificação e urbanização”
Tuir orientasaun Dekretu Lei 33/2025, ekipa sei:
– Estasinamentu: Tau sinál no avizu zona estasionamentu iha fatin hotu iha Dili. Kareta ne’ebé para iha espasu públiku hanesan estrada, trotoár no bairru sei hetan medida rigorozu, inklui prende kareta no kore xapa matrikula.
– Vendedor Ambulante: Proibe fa’an iha trotoár no espasu públiku, liu-liu iha Ponte Haburas, Kuluhun to’o Becora, Bairro Pite no Fatuhada. Sasan sira ne’ebé hetan sei hetan apreensaun.
– Animál: Sidadaun ne’ebé hakiak animál tenke tau iha fatin seguru. Animál ne’ebé la’o livre iha sidade sei hetan medida inklui entrega ba instituisaun karidade.
– Engarrafamentu: Atensaun espesiál ba área festa iha Metiaut no bairru sira iha kalan hodi evita engarrafamentu.
Germano husu ba emprezáriu, loja, restaurante no kafetaria sira atu prepara fatin estasionamentu rasik no soe lixu tuir oráriu ne’ebé estabelese ona husi ekipa jestaun merkadu.
Ekipa konjunta ne’e kompostu husi Diresaun Nasionál Transporte Terestre (DNTT), Autoridade Munisípiu Dili, Polísia Tránzitu, F-FDTL, Ministériu Obra Públika, no Administrador Postu Vera Cruz, Nain Feto, Dom Aleixo, Cristo Rei no Metinaro.
Jornalista: Moises Guterres
Editora: Gracia Soares
