Lafaek News (Lautem)—Professor ida hosi eskola Ensinu Sekundária Jerál Nino Koni Santana Lospalos, halo agresaun fíziku hasoru nia estudante nain rua too kanek iha ain, tanba deskonfia hasai liafuan mál hasoru mestre.
Vítima estudante na`in rua (Zafiano Xávio Sarmento no Denilson C. Pereira) haktuir Jornalista sira iha Komandu Polísia Muniípiu Lautém, tersa (13/02/2024) katak kronolojia husi akontesementu refere, manorin deskonfia sira na`in rua mak hasai lia mál ba mestre, nune`e mestre duni tuir no kaer toman sira, no lori ba eskritóriu eskola baku tuku-tebe to`o estudante na`in rua hetan kanek no bubu hosi parte ain.
“Tuir lolos la`os ami mak hún husi probléma dehan abuja mestre, maibé kolega sira balun mak abuja no halai, tanba mestre duni tuir kolega sira ne`e, entaun ami mós sente taúk no halai, entaun mestre kaer toman ami no deskonfia ami mak abuja Mestre, nune`e lori ami ba eskritóriu no baku, tuku tebe to`o ami nia ain ne`e kanek no bubu, tamba lá husu ami na`in 2 derepente baku, ami sente ladi’ak, ami langsung mai kedan iha polísia hodi hato`o ami nia keixa,” vítima estudante nain rua deklara ba Jornalista sira iha Komando Polisia Munisipiu Lautém.
Iha sorin seluk Diretór ESG NKS Lospalos, Grilo Fernandes, haktuir kona-ba asaun baku ne`e la`os ho edukativu, maibe mestre nervózu, tanba estudante sira ne`e dala ruma mestre sira haruka tama aula hodi tuir ensinu apréndizajen, maibé estudante sira halai, no hasai lia fuan mál, nune`e mestre duni tuir, kaer toman no lori ba eskritóriu no baku sira.
“Asaun baku ne`e la`os edukativu, maibe mestre nervózu, tanba estudante sira ne`e, dala ruma haruka tama aula, estudante sira halai, no hasai lia fuan mál, nune`e mestre duni tuir, kaer toman no lori ba eskritóriu no baku sira. asaun mestre nian ne`e la`os asaun edukativu, Diretor eskola ne’e akresenta
Diretór eskola ne`e mós konsidera katak, asaun mestre nian ne`e la`os asaun, la`os ódiu, más hanesan ema sempre hirus bainhira ema hasai lia fuan mál, nervozu iha tempu ne`eba mestri ne’e mos baku no tebe labarik ne’e to’o kanek.
Nia dehan, estudante sira atu hetan edukasaun ne`ebe di’ak, manorin sira mós tenke esfórsu hodi sai manorin ne`ebé di’ak, tenke ho asaun edukativu, la`os hatudu brutalizmu hasoru estudante sira hodi hamosu dezentendimentu entre alunu ho manorin.
Entretantu, kazu ne’e parte polísia sei hala’o investigasaun hodi hatene lolos motivu hosi akontesimentu refere.
Jornalista : CE. Lautém
Editór : Agapito de Deus
