Lafaek News—João Araújo Nu’udar eis komandante Pelutaun no eis seguransa (eskoltu privada) Prezidente Repúblika no Primeiru Ministru dahuluk 1975, Saudozu Nicolao Lobato, da-daun ne’e sai hanesan aileba faan sabraka ho modo-tahan hodi tulun moris loron-kalan.
Istória João Araújo kódigu “Loron-Manas” haktuir iha tempu rezisténsia nia hasumik an iha Brigada Soke, hodi kontribui nia luta ba libertasaun nasional, no sai mos nu’udar komandante pelutaun lidera forsas hamutuk 28 iha tempu funu ba ukun rasik an, tempu ne’ebá João Araújo “Loron-Manas” mos hakna’ar an hanesan eskoltu ba saudozu Nicolao Lobato ho durasaun fulan 5, bainhira inimigu serku abrigu saudozu Nicolao Lobato, João ho nia maluk lutador sira rekoa husi abrigu hodi salva an husi inimigu.
https://www.lafaeknews.tl/naran-nicolau-lobato-morin-lemorai-moris-fatin-duut-invade/
João nia maluk sira ne’ebé iha tempu rezisténsia 1975, balun lakon vida iha tempu ne’ebá, maibé balun ohin loron sei moris no goza noa sira nia terus no susar iha tempu luta hasoru invazor sira, maibé João Araújo “Loron-Manas” kontinua la’o iha loron manas leba nia modo ho sabraka la’o iha sidade Dili hodi buka osan hodi moris.
Ohin loron Ukun Rasik An, João la hetan direitu hanesan nia maluk lutador sira seluk, nune’e iha tinan 2003, eis eskoltu Nicolao Lobato ne’e, submete nia naran ba komisaun homanjen hodi hetan titlu veteranu hanesan nia maluk sira seluk, maibé hein too ohin loron rezultadu laiha halo nia lakon esperansa hanesan ema luta nain ida mos ba ukun rasik an ida ne’e.
“Iha tempu ne’ebé ami halo funu, laiha promete ida katak funu hotu estadu tenki selu ami, maibé Timor-Leste hetan ona ukun rasik a’an, estadu RDTL selu ona Veteranos barak, maibé nia husu ba estadu atu tau matan mós ba veteranus sira ne’ebé mak fo ona dedikasaun no kontribuisaun ba funu ida ne’e hodi Timor Leste ukun rasik an, atu nu’une dignifika veteranos sira ne’ebé mak seidauk hetan subsidiu bele hetan netik subsidiu husi estadu ida ne’e,” katak João Araújo alias Loron-Manas.
João Araújo orijenalidade husi suku Fada-Bloko, postu administrativu Reméxiu, munisípiu Aileu, iha oan nain rua feto ida ho mane ida, oan feto forma ona uma kain ketak no oan mane mesak eskola remata de’it iha nivel sekundária, iha hanoin atu kontinua, maibé haree krize finanseiru iha uma laran labele dudu oan mane ne’e kontinua estudu iha nivel ensinu universitária.
“Ha’u fa’an aileba dezde uluk too agora, sosa tutan sabraka husi ema seluk ho folin dolar 50, hodi faan tutan, manan fali osan funan dolar 15, sorte diak manan dolar 20, osan hirak ne’e rai hamutuk hodi responde nesesidade uma laran labele hamlaha,” katak eis seguransa Nicolao Lobato ne’e.
João relasa kona-ba nia direitu luta nian, depende ba estadu hakarak rekoñese ou la rekoñese, importante ema hotu sente ona Liberdade no goja ona ukun an ida ne’e, maibé importante liu mak nasaun tenke hakmatek, hamtetin pas no estabilidade atu povu bele moris hakmatek atu ida-idak buka moris hodi sustenta uma laran no buka osan selu oan sira nia eskola atu sai matenek hodi kontinua lidera nasaun ne’e iha futuru.
“Ami katuas ona, naran halo tun sa’e hanesan ne’e hodi moris, bastante labele ba tane liman no naok hodi moris, hisik rasik ha’u nia kosar-ben hodi moris,” João Araújo “Loron-Manas” hakotu lia ikus ho lafaek news iha Tasi-Tolu.
entretantu, relasaun ho notisia ne’e sei iha kontinuasaun, redasaun Lafaek News sei kontinua halo konfirmasaun ho instituisaun relevantes sira hodi ko’alia kona-ba asuntu ” João Araújo “Loron-Manas”nian hodi hetan direitu hanesan maluk sira seluk.
Jornalista : Crispin de J. Amaral
Editor : Agapito de Deus
