Lafaek News—Prezidente Partidu Congressu Nasional Rekonstrusaun Timor (CNRT) Kay Rala Xanana Guasmão ho Sekretariu Jeral, Francisco Kalbuadi Lay, kuarta (07/06/2023), hasoru malu ho Prezidente Repúblika José Ramos Horta, hodi aprezenta kona-ba formasaun governu da-sia ne’ebé klaramente sei forma husi CNRT ho PD.
Iha enkontru formal ne’e entre lideransa partidu CNRT nain rua halo reuniaun eskluziva ho Xefe Estadu José Ramos Horta, hodi informa ba Xefe Estadu katak Partidu CNRT ho Partidu Demokrátiku mak sei la’o hamutuk forma governasaun da-sia.
Iha biban ne’e, lider karizmátiku ne’e informa ba jornalista sira katak nia rasik husu ona ba Xefe Estadu kona-ba kalendáriu nune’e sei too loron 15, no iha loron 22 sei hili Prezidente Parlamentu Nasional foun, no tuir kedan hili komosaun sira.
“Informa ba Xefe Estadu katak partidu CNRT no partidu PD sei la’o hamutuk iha nonu governu no husu mós ba Xefe Estadu kona-ba kalendáriu katak hein to’o loron 15, no sei monu iha loron 22 Juñu no iha loron daruak eleisaun ba PPN foun no tuir mai komisaun sira,” katak Kay Rala Xanana Gusmão hafoin remata enkontru ho Xefe Estadu kuarta ne’e iha palasiu prezidensial Bairu-Pité Dili Timor Leste.
Bainhira, Xanana Gusmão ko’alia asuntu ne’e remata, lider nasional ne’e toka mós asuntu fraude nasional ne’ebé akontese iha eleisaun parlamentar 2023, pozisun CNRT sei lori kazu fraude eleitoral ne’e ba justisa hodi kasitgu ema ne’ebe komete kazu ne’e nune’e iha futuru labele akontese ba jerasaun foun.
“Fraúde eleitorál ne’ebé CNRT haree, fiskais partidu nian ne’ebé iha STAE no CNE aprezenta ona no hotu-hotu hatene tiha ona katak Partidu CNRT la simu no CNRT hakarak protesta no tau fraude eleitorál ne’e ba oin la’ós atu altera rezultadu, CNRT simu maibé CNRT (ami) la simu mak fraude eleitorál ne’e rasik, kazu ne’e partidu CNRT sei lori ba oin,” hateten Prezidente Partidu CNRT Kay Rala Xanana Gusmão.
Xanana Gusmão, akresenta kazu ne’ebé partidu CNRT sei lori ba oin ne’e atu bele hanorin jerasaun foun no futuru lideransa país ninian labele monu tan ba problema hanesan ne’e iha future oin mai.
“Iha fatin balun ne’ebé deputadu CNRT nian iha ne’eba ho tan fiskais, CNRT hetan votus 0, ida ne’e ita sente katak demais, ami bolu kedas deputada Bendita Magno hodi dehan bee imi la vota, imi absten fali imi nia sentru votasaun maibé deputada sira hatan sira iha ne’eba no CNRT hetan votus 0, ne’e signifika votu ne’ebé CNRT hetan fó fali ba partidu seluk, ida ne’e mak halo ami la simu”, tenik Lider Karismatiku Kay Rala Xanana Gusmão.
Tuir Prezidente partidu CNRT ne’e katak, parte partidu CNRT la reklama ona, CNRT hakarak prosesu ne’e la’o nafatin ba oin, ida ne’e partidu reklama atu bele kastiga tiha ema ne’ebé halo, hodi hanorin katak iha futuru rai ida ne’e hotu-hotu tenke respeita lei, iha demokrásia nia laran hotu-hotu tenke ezerse ninia direitu, labele tan akontese tanba sei iha eleisaun suku, sei iha eleisaun ba desentralizasaun nune’e kurize agora atu labele akontese iha futuru fraúde eleitorál tanba ne’e krime.
Entretantu antes ne’e mós iha loron 07/06/2013 Partidu CNRT halo ona konferénsia imprensa iha sede Partidu CNRT relasiona ho asuntu ne’e, katak mosu Fraude Eleitorál iha eleisaun parlamentár tinan 2023, enkuantu iha enkontru formal entre partidu CNRT ho Prezidente Repúblika José Ramos-Horta ne’e, Xanana Gusmão informa ba Xefe Estadu katak partidu CNRT no partidu PD sei la’o hamutuk iha governu da-sia no husu mós ba Xefe Estadu kona-ba kalendáriu katak hein to’o loron 15, no sei monu iha loron 22 Juñu no iha loron daruak eleisaun ba PPN.
Jornalista : Rita Moniz
Editór : Agapito de Deus