Lafaek News—Prezidente Partidu Demokrátiku (PD), Mariano Assanami Sabino Lopez, informa iha ámbitu formasaun governu da-sia, PD nia pozisaun sei la ezije kargu tanba PD opta prinsípiu responsabilidade.
Assanami hatoo asuntu ne’e hafoin hasoru malu ho Prezidente Repúblika José Ramos Horta, kuarta (07/06/2023), iha palasiu prezidensia Bairu-Pité, hodi hateten PD opta prinsipiu responsabilidade no iha defaktu hatudu liu husi CNRT no PD ninia enkontru ho Prezidente Repúblika hodi husu ema hotu-hotu iha responsabilidade boot iha tinan lima oin mai.
“PD sei la ezije pasta ba membru governu tanba PD opta prinsipiu responsablidade no iha defaktu hatudu liu husi ami nia enkontru ho Prezidente Repúblika no Xefe Estadu husu atu hotu-hotu iha responsablidade ba governasaun dasia atu sai hanesan governu ida ho responsablidade bo’ot ba tinan lima oin mai ne’ebé sei ko’alia ho hamutuk ho Partidu CNRT,” Assanami afirma.
Assanami reafirma, PD seidauk diskute partikularmente area espésifiku iha governasaun tanba iha sorumutu ne’ebé halo ho partidu CNRT iha de’it aseitasaun ba koligasaun no la ko’alia ba fahe kadeira tanba seidauk iha enkontru ofisiál atu diskute estrutura governasaun da-sia inklui programa governu.
“Ohin ami mai hasoru Prezidente Repúblika tanba Xefe Estadu mak konvida atu hato’o kalendáriu no mós hanoin balun ne’ebé atu la’o ba oin, atu konfirma mós PD ho CNRT ninia lala’ok na oin depois tempu badak Xefe Estadu sei bolu fila fali la’ós ona mai ida de’it maibé PD ho CNRT sei mai hamutuk fali asuntu ida,” Assanami tenik.
Hodi dehan, PD nia pozisaun saida de’it, ne’e partidu prontu hotu maibé agora ne’e lá’os PD, tanba PD iha de’it kadeira neen, ne’ebé ne’e iha CNRT mak autoridade ida ne’e, se bainhira PD ho CNRT la’o hamutuk sei ko’alia hamutuk, la’ós deside rasik ne’ebé hanoin PD ne’e husi kedas leten to’o fali karik ne’e uluk Prezidente Repúblika ne’ebé buat hotu-hotu ne’e PD prontu hela.
Iha biban ne’e, lider Partidu Demokrátiku ne’e hatoo parabens ba povu tomak konfiansa ne’ebé fó ba Partidu Demokrátiku iha eleisaun parlamentár tinan ne’e, PD sempre preparadu prontu hela ne’ebé kalendáriu ne’e Xefe Estadu nia liman.
Kona-ba adiamentu posse no plenária ba VI lejislatura ne’ebé sei dada to’o 22 Juñu , nia dehan, PD laiha obzesaun tanba tuir lei ne’ebé konsta katak hafoin validasaun rezultadu eleisaun parlamentár iha Tribunál Rekursu fó prazu loron 15 atu bele iha plenária ba lejislatura foun tanba ne’e tuir de’it rejimentu legál ne’ebé iha.
“Ha’u hanoin remodelasaun ne’ebé akontese iha 2015 razaun tanba fronteira marítima presija konsolida tanba ne’e mak iha faze pur faze sempre iha razaun no ba PD rekoñese ida ne’e hanesan prosesu konstrusaun ida, konstitusaun ba estadu no konstrusaun ba partidu ne’ebé hanoin katak ba oin PD sempre simu asuntu sira ne’ebé liga ba interese nasionais no PD kumpri saida mak importante, imi hotu-hotu hatene katak PD kumpri to’o PD Fretilin nia governasaun mak asina fronteira maritima no PD haruka tanba PD deside inisiu defende fronteira maritima ne’ebé sasán ba interese estadu, interese nasionál ne’e PD sei kumpri,” Mariano Assanami Sabino haktuir.
Tuir nia, PD konkorda atu servisu hamutuk iha forsa polítika no forsa sosiadade nian, hodi serví di’ak liu tan Timor Leste, ida seluk, kona-ba prioridade, PD ho CNRT seidauk hamutuk hasoru Prezidente Repúblika ne’ebé seidauk iha diskusaun, primeiru tenke diskusaun ba programa saida mak prióridade.
“Ita sei ko’alia depois ita hamosu organugrama atu realiza programa depois mak atu haree ema ne’ebé atu tama estrutura atu servisu ne’e normalmente tenke la’o hanesan ne’e, tan ne’e Programa sira ba IX governu sei disksute hamutuk entre PD no CNRT.
Jornalista : Rita Moniz
Editor : Agapito de Deus
