Lafaek News—Ministru Komérsiu Indústria (MCI-sigla Portugés), Nino Pereira, afirma iha tempu badak sei resolve problema no preokupasaun sira ne’ebé negosiante ambulante hasoru.
Assuntu ne’e hato husi Ministru Komérsiu no Indústria, Sesta (04/08/2023), hafoin vizita negosiante ambulante sira iha Largo Lecidere ho merkadu Taibesi, liu husi vizita ne’e hodi haree no observa kondisaun negosiante sira nian.
“Ita ohin halo atividade vizita supresa ida ba iha largo Lecidere ne’ebá hodi Rona mós preokupasaun sira husi ita nia Vendedores Ambulante sira ne’ebé mak Durante ne’e sira nia preokupasaun ho sira nia kondisaun faan sasán iha ne’ebá tanba ne’e husi Ministériu Komérsiu Indústria buka esforsu oinsá no buka medidas sira ne’ebé mak ita bele iha tempu badak bele rezolve problema ne’ebé mak ita nia negosiante ambulante sira hasoru hela,” dehan Nino Pereira.
Governante ne’e dehan tan maske sei la halo milagre maibé sei buka intera preokupasaun negosiante sira hatoo no mós sei halo diálogu ida hodi bele fo solusaun ba negosiante ambulante, tanba ne’e MKI mós sei halo kordenasaun ho autoridade munisípiu Dili ho mós jestaun merkadu sira oinsa resolve kestaun negosiante ambulante sira nian.
“Ita sei halo koordenasaun inklui mós ho autoridade Munisípiu Dili ho ekipa jestaun Mercadu atu nu’une sira ho voluntariamente kopeea maske ita dehan katak fatin ne’e fatin públiku maibé ita mós tenki konsidera sira nia esistensia iha ne’eba tanba sira balun faan iha ne’ebá iha tinan naruk nia laran,” governante ne’e sublina.
Iha sorin seluk Kordenador Jestaun merkadu Taibesi António Manuel de Araujo argumenta, nia parte kontente ho membru governu foun nian ne’ebé halo obeservasaun hodi haree direta no rona preokupasaun vendedores sira nian.
Ha’u kontente ho membru Governu foun ninia obeservasaun mai mercadu taibesi ligadu ba ita nia Vendedores sira iha Mercadu no hare Direita jestaun mercadu nian”
Etretantu negosiante sira ne’ebé faan sasán permanente iha merkadu Taibesi ho totál dadus hamutuk 1563, no negosiante sira ne’e mai husi munisípiu 12 inklui mós RAEOA.
Jornalista : Felix Fernandes
Editor : Agapito de Deus
