Lafaek News—Governu Timor-Leste liuhosi Sekretaria Estadu Cooperativas – SECoop sei sai na’in ba eventu rejionál boot rua hanesan Díli Regional Cooperative Conference and Ministerial Dialogue 2026 no ASEAN Cooperative Expo 2026.
Eventu ne’e sei realiza iha 1 to’o 4 Outubru 2026 iha Centro de Convenções de Díli – (CCD) ho tema “Hametin Komunidade sira, liga nasaun sira”, eventu ne’e sei reúne Ministru, funsionáriu governu, reprezentante kooperativa, péritu, no setór privadu husi nasaun ASEAN 10 no Timor-Leste.
Tuir Presidente Komisaun Organizadora, Oldérico Lopes, eventu ne’e hanesan oportunidade importante atu Timor-Leste, aprende husi esperiénsia nasaun seluk no hametin nia integrasaun iha ASEAN.
Programa prinsipál konferénsia 1-4 Outobru diskute polítika, inovasaun, no finanseiru ba kooperativa.
diálogu ministeriál 3 Outobru, Ministru sira diskute parseria rejionál iha sesaun ne’ebé odamatan taka ba publiku
ASEAN Expo 2-4 outobru hatudu produtu husi 80 kooperativa Timor-Leste ne’ebé selesionadu ona, inklui kompania sira hanesan Pepe’s Coffee no Moringa, objetivu la’ós de’it atu faan, maibé atu kria akordu negósiu ho nasaun seluk.
Tuir Sekretáriu Estadu Cooperativas, Arsénio Pereira da Silva, orsamentu ba eventu ne’e hamutuk $614,000 husi OGE 2026.”Objetivu mak atu loke dalan ba kooperativa Timor-Leste nian bele esporta, ezemplu fos-mean orgániku ba nasaun seluk, ne’e mak integrasaun ekonómiku loloos,” Arsénio Pereira SEKoop.
Eventu ne’e mós parte ida husi preparasaun Timor-Leste nian ba sai Prezidente ASEAN iha 2029.
Jornalista : Lino Sarmento
