Lafaek News—Primeiru Visé Komisaun Kombatente Libertasaun Nasional, João Miranda “Aluk”, ho nia ekipa aprezenta ona lista sidadaun hamutuk na’in rihun rua (2000) resin ne’ebé sei simu kondekorasaun iha loron 28, Fulan-Novembru tinan ne’e ba Prezidente Repúblika José Ramos-Horta.
“Ideias prinsipais tolu mak ami lori mai hasoru sua exelénsia Prezidente Repúblika, liu-liu kona-ba serimónia 28 de Novembru ami atu kondekora ba ita-nia maluk sira ne’ebé mak fo nia partisipasaun ba iha prosesu funu naruk ne’e,” dehan João Miranda “Aluk”, hafoin aprezenta lista kondekoradu sira ba Prezidente Repúblika José Ramos-Horta, iha Ai-tarak Laran Dili (14-11-2023).
João Miranda “Aluk” informa, alende nee aprezenta mos lista frente externa ne’ebé fo mos kontribuisaun ba povu Timor-Leste nia luta durante tinan 24, tanba iha tempu rejistensia José Ramos-Horta mak representa espesial CNRT nian iha estranjeiru.
“Nia mak koñese di’ak liu ema sira ne’e hotu, tanba nee mak lista nee ami lori mai atu Señór Prezidente Repúblika konfirma ema sira ne’ebé naran iha lista ne’e los ka lalos” tenik Veteranu ne’e.
Aluk informa, lista anivel nasionál no munisípiu hamutuk ema rihun rua resin. “Ita iha dois mil pessoas,” relata Brigadeiru Jeneral ne’e.
Kondekorasaun ne’e Estadu sei fo liuhosi Dekretu Prezidensia Repúblika nian ne’ebé fo sai ona iha Jornal Repúblika.
Primeiru Visé Komisaun Kombatente Libertasaun Nasional, ne’e mós informa kona-ba prosesu rejistu dadus Veteranu, iha ne’ebé faze rejistu ne’e iha rua, primeira faze rejistu ne’e iha 2003-2005 no segunda faze ne’e rejistu iha 2009.
“Primeira faze ne’e nia prosesu balun sei pendente hela, balun reklamadu. Agora rejistu 2009 iha primeira rejistu, ita iha setenta i tal mil kuaze oitenta, Iha segundu rejistu ne’ebé mak halo iha 2009 ita iha 120 i tal mil rejistadu ne’ebé agora iha faze,” nia dehan. verifikasaun” hakotu nia.
Tanba ne’e, nia husu ba timor-oan hirak ne’ebé rejista ona naran iha Komisaun atu aproveita tempu hodi halo verifikasaun ba naran sira, tanba ne’e bainhira tempu ka faze verifikasaun ne’e bainhira liu ona ida ne’e maka sei laiha tan ona dalan atu hadi’a.
Estajiada : Epifania I. Pinto
Editor : Marcos Araujo
