Lafaek News–polísia Nasionál Timor-Leste (PNTL) liu-hosi Diresaun Servisu Investigasaun Kriminál (DSIK) Esquadra Kristu Rei, iha Kuarta feira, 08/07/2026, kaptura sidadaun Xineza hamutuk 24 ne’ebé deskonfia komete atividade ilegál jogu online no scam call center iha uma arenda ida iha Metiaut.
Porta-vóz PNTL, Superintendente Xefe Polísia João Belo dos Reis, relata ba jornalista sira katak operasaun kontinua la’o.
“Agora dadaun operasaun lao hela iha parte Metiaut, detekta ona sidadaun Xineza hamutuk 24, nain 7 agora iha DSIK, no nain 17 sei hela iha Esquadra Becora no sei transporta ba Komandu Jerál Kaikoli hodi tuir prosesu investigasaun,”Porta-vóz PNTL, Superintendente Xefe Polísia João Belo dos Reis ba jornalsita liu husi konferenia imprensa iha quartel Caicoli 09/07/2026.
Nia hatutan, PNTL konsidera kazu ne’e nu’udar flagrante delito. Meius hotu ne’ebé uza hanesan mosu iha atuasaun iha Tibar. Tipu operasaun la diferente.
PNTL uza meius hodi detekta sidadaun Xineza sira, inklui komunika ho parseiru internasionál husi nasaun Austrália, Indonézia no nasaun seluk ne’ebé iha esperiénsia hanesan, hodi ajuda rekolla informasaun no halo investigasaun kle’an ba asuntu refere.
“Nu’udar PNTL sei servisu maka’as atu detekta movimentu sidadaun Xineza tanba balu konsege eskapa sai ona husi fatin refere bainhira PNTL halo intervensaun. Ami mós fahe ona informasaun ba Servisu Imigrasaun atu bele detekta sidadaun Xineza ne’e bainhira sira tenta atu halai sai husi territóriu Timor-Leste,” nia esplika.
PNTL sei nafatin koordena no alarga komunikasaun ho Servisu Imigrasaun. Tuir nia, falénsia ruma ne’ebé hetan iha deteksaun problema atendimentu iha nasionál, tenke hadi’a hamutuk.
Alende ne’e, DSIK reafirma kompromisu atu kombate krime transnasionál organizadu no krime sibernétiku. Maske hasoru limitasaun oioin, PNTL sei la fó fatin ba krime organizadu atu lao iha nasaun Timor-Leste.
PNTL konsidera sidadaun Xineza sira ne’ebé detekta iha fatin ne’e nu’udar autor ba atividade refere. Tanba tuir pasaporte no viza ne’ebé sira uza, sira hotu “eskapa” husi atuasaun autoridade Cambója nian, no PNTL konsidera sira nu’udar autor prinsipál.
Antes ne’e, iha loron 08/07/2026, tuku 11:30 TL, PNTL liuhusi DSIK mós halo operasaun iha Aldeia Lemokari, Postu Administrativu Dom Aleixo, Munisípiu Dili.
Operasaun ne’e bazeia ba informasaun husi Polísia Imigrasaun katak iha uma ida halo atividade ilegál. Iha fatin ne’e, PNTL detekta sidadaun Xineza hamutuk nain 28 no sidadaun Kambója 1 ne’ebé komete hela atividade scam online no jogu online.
Husi buska ne’e, PNTL apreende evidénsia sira hanesan: Telefone 60; Tablet Samsung 2;Router 3; Komputador 32; Osan kás $5.632; Pasaporte 29.
Sidadaun Xineza sira tama mai ho viza turizmu. PNTL sei halo identifikasaun kle’an hodi hatene se iha ne’ebé overstay ona ka komete violasaun seluk.
Prosedimentu ne’ebé PNTL halo ona maka identifikasaun formál, agora dadaun sira na’in detein hela iha sela detensaun Dom Aleixo durante oras 72, hafoin sei aprezenta ba Ministériu Públiku hodi prosesa ba tribunál.
PNTL apela nafatin ba sidadaun Timor-oan ne’ebé arenda sira-nia uma ba sidadaun estranjeiru atu kontrola ho didi’ak. Tanba estranjeiru balu uza uma privadu hodi halo atividade ilegál hanesan jogu online ka call center online.
Jornalista : Moises Guterres
Editora : Gracia Soares
