Lafaek News—Presidente Repúblika José Ramos-Horta husu ba embaixadora foun Filipina ba Timor Leste Belinda Mariano atu esforsu hatuur prióridade kapasitasaun iha área diplomasia no finansas.
Asuntu ne’e hato’o husi sekretáriu Jerál MNEK Francisco Tilman Cepeda hafoin Prezidente Repúblika José Ramos-Horta Simu karta kredensiál husi Embaixadór Filipina iha Timor Leste, iha Palasiu Prezidensiál Bairu-Pite kuarta ( 03/05//2023).
“Ohin Embaixadór Filipina ba Timor Leste apresenta karta kredensiál ba Prezidente Repúblika José Ramos-Horta, depois apresenta karta ne’e ami enkontru ho PR Horta keleur ituan tanba diskuti isu barak, importante liu iha diskuzaun ne’e mak Presidente Repúblika José Ramos-Horta husu ba Embaixadora foun Filipina nia atu halo esforsu tomak atu bele tau prióridade filipina nian liu-liu iha kapasitasaun”, hateten Sekretáriu Jerál MNEK Francisco Tilman Cepeda ba jornalista sira iha Palasíu Prezidensiál Bairu-Pite kuarta (03/05/2023).
Sekretariu Jerál MNEK dehan, Tanba haree ba katak Timor Leste la keleur tan sei tama ASEAN, entaun TL tenke prepara rekursu di’ak liu tan, nune’e TL tama bele halo servisu ne’ebé di’ak, kualidade tuir rekezitu ne’ebé iha.
“Iha área oin oin, área ne’ebé mak liga ho diplomasia, finansas no área seluk seluk tan, hanesan imi hatene katak ita uluk kedas kooperasaun ho Filipina iha área edukasaun, ita haruka ita nia estudante barak ba filipina, agora graduadu husi Filipina barak tebetebes ne’ebé servisu iha Ministériu hotu-hotu ne’ebé mak iha”, informa Sekjer MNEK Francisco.
Entretantu, Esperiénsia hatudu katak estudante sira ne’e iha kualidade di’ak tebetebes, halo servisu di’ak tebetebes iha institutusaun sira ne’ebé mak estudante servisu ba, nune’e mak Prezidente Repúblika husu Filipina bele fó nafatin importánsia ba área ida ne’e.
Enkuantu MNEK ne’e hateten, iha diskusaun ne’e, Embaixadora Filipina ba Timor Leste Belinda Mariano Ante apresia tebetebes, Emabiaxadóra dehan servisu ne’e hala’o keleur ona no Embaixadora sei halo esforsu dezenvolve liu tan área ne’ebé mak Presidente Repúblika hakarak.
Jornalista : Rita Moniz
Editór : Agapito de Deus