Lafaek News—Benifisiária Manuela da Silva orgullu Prezidente Repúblika José Ramos-Horta nia prejensa uma tali tahan nakfilak ba uma mutin ho medida 9×7 kompostu husi kuartu tolu, haris fatin ho salai da.
Benefisiária Manuela da Silva hato’o sentimentu orgullu ne’e ba jornalista hafoin representante Prezidente Repúblika Xefe Kaza Sivil Prezidensia Repúblika Bendito dos Santos Freitas entrega uma ne’ebé Presidente Repúblika ajuda iha suku Bekora semana ne’e.
“Orgullu ba Prezidente Repúblika José Ramos Horta ho nia ekipa nia ajuda no tulun, tanba antes ne’e ami nia uma tali tahan, depois prezensa Xefe Estadu mai haree direitamente ho matan rasik sai uma mutin kalen”, hateten Benefisiária Manuela iha suku Bekora foin lalais ne’e.
Nia dehan, mezmu moris hanesan ema kbiit la’ek, maibé la lakon esperansa hodi buka moris nafatin liu husi terigu, nune’e sustenta ba uma laran no mós ba oan sira nia eskola.
“Ami nia uma antes ne’e uma tali, maibé agora sai uma kalen mutin ne’e, ha’u orgullu tebes ba Prezidente Repúblika ne’ebé ajuda no tulun ba ami, tanba ami nia moris ne’e ema kbiit laek duni, ami nia moris ne’e la hanesan ema seluk, ami nia moris ne’e ho buka moris ho trigu mak hodi sustenta uma laran no mós oan sira nia eskola,” dehan Benifisiária Manuela da Silva ba jornalista sira hafoin ekipa Prezidensia Repúblika entrega uma refere iha Suku Bekora, Kinta (27/4).
Iha fatin hanesan, Xefe Suku Bekora, António da Silva Soares kongratula Prezidente Repúblika José Ramos Horta tanba bele halo uma ba povu parabens ba Prezidente Repúblika, tanba bele halo uma ba povu, ida ne’e mak dehan sa’e ba Prezidente Repúblika atu ajuda povu.
Nia haktuir, Suku Bekora ne’e ema kbiit laek barak liu, maibé husu ba Xefe Estadu se bele karik halo aumenta tan uma sira ne’e ba ema ne’ebé presija tulun.
Nia hatutan, iha rinsn 2008 Prezidente Repúblika rasik nia halo uma lima iha Bekora meia parede, agora halo ne’e uma ne’ebé di’ak no kapás tebe-tebes, nune’e, rekomenda ba Prezidente Repúblika, se bele karik tama sai aldeia no suku hotu-hotu atu bele halo uma ba ema kbiit laek.
Entretantu, Asesór Sosiédade Sivil Prezidensia Repúblika, Quntiliano Moniz Carvalho hatete, uma ne’e gasta $5.720 dollar tanba ne’e la selu badaen, staff sira, iha Palasiu Prezidensiál rekruta staff sira servisu komunitári, identifika familia ruma bainhira kondisaun la di’ak, sira hato’o pedidu ruma, iha ekipa ida ba identifika sira mak merese duni apoiu entaun ko’alia ho Prezidente Repúblika, maibé, agora ne’e orsamentu husi Prezidente Repúblika nia osan privadu rasik iha $3.50 dollar no la to’o entaun foti tan osan husi Gabinete Prezidensia Repúblika, uma refere ho medida, uma ne’e hahú iha fulan 6 Janeiru, remata iha fulan Abríl 2023.
Jornalista : Rita Moniz
Editor : Agapito de Deus
