Lafaek News-Polisía Nasionál Timor-Leste (PNTL), dadaun ne’e prosesa ona autór ne’ebé organiza familia sira  halo festa hodi selebra aniversaríu ba dala 47 iha Kolmera Dili  02/05/2021, no momentu ne’ebé governu aplika  komfinamentu obrigatóriu  iha munisípiu Dili,

Portavos PNTL Superintendente Xefe, Arnaldo Araújo, informa, Dadaun ne’e Polisía Nasionál Timor-Leste (PNTL), Liu husi SIK halo tiha ona identifikasaun ba festa na’in inan-oan inan ho inisiál CP no oan JAP nune’e mós SIK sei bolu ema ne’ebé partisipa iha festa ne’e

“Agora polisía halo ona identifikasaun hotu ona ba ema ne’ebé partisipa iha festa ne’e inkluí ema ne’ebé organiza festa, agora dadaun sei  prosesu hela tanba ne’e husu públiku atu fo fiar nafatin ba polisía atu halo ninia servisu, no Polisía iha nia maneira no tatika ne’ebé iha la presiza hato’o ba públiku atu hatene tanba ida-ne’e PNTL nia servisu,” dehan Portavoz, Arnaldo ba Jornalista iha komandu Jerál Kaikoli Dili, Kinta 06/05/2021.

Portavoz PNTL  ne’e esplika tan, Durante Estadu Emerjénsia ba dala XIII SIK identifika ema hamutuk na’in 95 ne’ebé komete kazu dezobedensia la kumpri estadu emerjénsia agora sira nia prosesu la’o hela no lori ona ba ministériu públiku.

Antes ne’e, iha loron 29 fulan abríl 2021, governu liu husi reuniaun Konsellu Ministru (KM) aprova ho alterasaun projetu rezolusaun governu ba impozisaun konfinamentu domilisiáriu jerál  iha munisípiu Dili.

Jornalista :Orlando Magno

Asisten editór: Egidio Nono