Manufahi-(Lafaek News)—Komanadu PNTL Manufahi Superintendente Polísia, Joni Viana Das Regras, informa lideransa komunitaria ne’ebé polísia detein sela detensaun oras 12 nia laran tanba kontra regras EE halo festa hodi halibur malu liu ema na’in 10 ba leten iha suku Baublo Postu Same munisipiu Manufahi inklui médiku no ema balun mediku ho funsionáriu públiku.
“Ita nia lei iha ona kona-ba EE nian tanba polísia mos hein para ezekuta de’it tuir saida maka iha ona. Ita xamada sira lider komunitaria sira husi suku Babulo nian no mos xefe aldeia, funsionáriu públiku balun inklui ho ita nia doutor balun ne’ebé kontra ona Regras estadu emejensia ninian tanba ne’e ita bolu mai hodi halo presta deklarasaun,” Hateten komandu Polísia Manufahi ba lafaek news foin lalais ne’e iha nia kan’ar fatin Manufahi.
Nia hatutan, PNTL hala’o kapturasaun ba xefe do suku Babulo postu administrativu Same Manufahi, kaer suspeitu na’in 4 refere iha loron 3 fulan janeiru tinan 2021 no na’in 2 iha kuarta feira ne’e hanesan xefe aldeia ho xefe juventude suku Babulo nian.
“Tanba sira kontente jovem sira manan bola tanba ne’e maka sira hakarak halo festeza ba torneio jogu ne’ebé loke tiha ona iha tinan kotuk, maibé sira haluha sala katak agora ita sei iha EE nia laran hela.”nia deklara.
Iha sorin seluk xefe suku Babulo postu administrativu Same Aliçe de Jesus Nunes, klarifika hanesan lideransa komunitária suku Babulo prontu kolabora hamutuk ho polísia, tanba ne’e polísia halo detensaun de’it ba xefe aldeia Searema ho xefe juventude, maibé xefe suku ho xefe aldeia sira seluk inklui funsionáriu sira polísia bolu ba prestasaun de’it.
Jornalista : Manuel Andrade
Editora : Nelya Barros
