Lafaek News–Governu liuhosi Ministru Administrasaun Estatál (MAE), Miguel Pereira de Carvalho, afirma hodi konsidera informasaun ne’ebé espaila iha públiku kona-bá Prezidente Autoridade Munisípiu Dili maka Abílio Mesquita ‘Mau soko’ ne’e laloos tanba informasaun laloos.
“Informasaun ne’ebé maka sai iha públiku, ita boot sira rona ne’e infelizmente ne’e laloos, loloos maka komisaun juri ba rekrutamentu ba administradór no presidente autoridade sira iha hela prosesu rekrutamentu,” informa MAE Miguel iha pallasu governu, sesta (08/01).
Membru governu hosi partidu viabilizador ne’e reforsa, kona-ba prosesu ida ne’e agora daudauk iha hela faze selesaun nia laran ba kandidatura sira ne’e ne’ebé prepara hosi ekipa juri ba rekrutamentu nian no sei fó sai iha tempu badak.
“Agora komisaun juri iha ona fase ida atu fó sai lista definitivu ba kandidatu sira ne’ebé maka elejivel atu tuir provas eskrita, Dili nian hanesan faze ida agora daudauk ne’e, kandidatu lubun boot ida atu ba tuir provas eskrita ne’ebé bele hahú provavelmente iha fin de fulan ida ne’e, ou bele mós inisiu fulan oin,” nia tenik
Fundamentu nia, bainhira iha prosesu ka faze selesaun ne’e ramata, ekipa ne’ebé toma konta ba asuntu ne’e sei lori mai ministériu depois enkamina ba enkontru ezekutivu hodi tau konsiderasaun hodi deside sé maka iha direitu hodi lidera munisípiu kapitál nasaun ne’e.
“Prosesu ne’e halo hotu komisaun de juri lori mai MAE, para hodi ba konsellu ministru atravesa husi rezolusaun governu nian konsellu ministru delibera se maka sei sai prezidente autoridade ba munisípiu Dili, no mós munisípiu haat ne’ebé maka iha hela fase prosesu rekrutamentu hanesan Bobonaru, Likisá, Ermera no mós Manatutu,” katak nia
Alende ne’e nia parte mós informa katak, kona-ba sesé maka kompete hodi sai na’in ba munisípiu Dili, nia la dekor más nia fiar katak ekipa ne’ebé toma konta ba asuntu refere sei taka sai naran hirak ne’ebé maka atu tuir ezame ba pozisaun importante ne’e.
Dehan nia hodi rekoñese, kona-ba Abílio Mesquita ‘Mausoko’ iha hotu más la signifika katak nia maka assume ona kargu refere, tanba buat hotu-hotu iha ninia prosesu la’ós arbiru.
“Ha’u la konfirma ida ne’e, mas kuandu juri taka sai ona maka ita bele haree katak naran (Abílio Mau soko) iha ka lae, mas ha’u haree iha lista provizóriu taka sai ne’e naran iha hotu, depois lista provizóriu taka sai kandidatu balun aprova no balun esklui do temporariamente, ne’e tenke kompleta dokumentu sira,” salienta nia
Afirma nia, karik iha kandidatu balun maka hetan esklui maibé ida ne’e ekipa juri ba rekrutamentu sei fó tempu ba sira hodi hato’o reklamasaun iha loron 5 nia laran hodi hetan konsiderasaun ka lae antes ekipa foti desizaun ka deside taka sai naran hodi tuir prova eskrita.
Iha biban ne’e nia informa objetivu ohin mai hasoru xefe governu atu informa de’it kona-ba kandidatura hosi munisípiu 3 ne’ebé mak hetan fiar hosi MAE ba pozisaun hanesan Prezidente Autoridade Munisípiu nian ne’ebé sei hetan posse iha tempu badak.
“Ohin mai hasoru exelénsia primeiru ministru (Taur Matan Ruak) hodi informa planu governu nian ne’ebé maka iha semana oin sei fó posse ba administradór foun munisípiu Lautein iha segunda feira no mós ba prezidente autoridade munisípiu Baukau iha tersa feira no administradór Vikeke iha kinta feira semana oin,” hakotu nia
Jornalista : Pedro de Almeida
Editór : Ezequias Tomás
