Lafaek News–Manufahi Oan ne’ebé sirkula iha Dili, lansa Sentru Solidariedade hodi apela ba públiku atu fó apoiu urjente ba komunidade afetadu dezastre naturál iha Kosta Súl.
Portavoz Manuel da Costa Mesquita hateten katak mudansa no kalamidade ne’ebé akontese motiva Manufahi Oan iha Dili atu hamutuk buka apoiu solidariedade ba maluk sira iha postu Alas, Fatuberliu, Same no Turiscai.
“Iha situasaun ne’ebé susar tebes ba ita-nia maluk afetadu sira iha Kosta Súl, ami labele nonok hodi hateke de’it ba terus ne’ebé sira simu daudaun,” Portavos Manuel da Costa Mesquita hato’o ba Jornalista sira iha salaun FONGTIL Kaikoli Segunda 18/05/2026.
Portavoz Manuel hato’o katak inundasaun akontese husi Same Vila sorin husi Betano ba to’o Kosta Súl, Alas no Fatuberliu. Enkuantu rai halai ka erosaun akontese iha Same Vila, Suku Dai-Sua.
“Total uma kain ne’ebé maka provizóriu mak 32, uma kain ne’ebé afeta inundasaun ne’e iha 106, ida ne’e hosi kedas Same ba to’o iha Fatuberliu,” portavoz Manuel hateten.
Nia hatutan katak vítima sira hetan ona apoiu urjente hosi APC no Ministériu Solidariedade Sosiál no Inkluzaun (MSSI), maibé presiza nafatin apoiu adisionál husi públiku.
“Sentru Solidariedade husu kontribuisaun urjente ba ai-han hanesan foos, produtu instante, sardina no masin midar. Sasán nesesidade báziku seluk inklui roupa móos ba labarik no adultu, kolsaun, sabaun, pasta nehan, pensu ijiéniku ba feto, no ai-moruk báziku.
Porta voz hatutan katak sasán ne’ebé presiza liu mak ba inan-feton, labarik no ema ho defisiénsia sira.
“Dadus foun ita kontinua atualiza nafatin. Presiza loos maka sasán ba inan-feton sira, labarik no defisiente sira,”Portavoz dehan.
Entretantu Kampaña rekolla apoiu sei la’o iha faze rua durante fulan ida, hahú hosi 18 Maiu to’o 18 Juñu 2026. Públiku ne’ebé hakarak fó apoiu bele lori direta ba Sentru Rekolla iha Sede FONGTIL, Kaikoli, Dili, ka kontaktu ekipa koordenasaun.
Jornalsita : Moises Guterres
