Lafaek News—Klamar la tauk, la hakiduk no la hakfodak, ho lian makas ne’ebé hatauk tebes fuan atu nakdoko hodi hakur mota be ho korente bee ne’ebé forte tebes, tan de’it tauk falta eskola no lakon materia loron ida nian.
Estudantes no komunidade suku Aitmua hakur husi mota ne’ebé boot tebes iha postu Turiscai hodi ba buka moris no estudante sira bele tuir aprensizajen hosi suku Aitmua ba postu Turiscai, maske udan tau maka’as, laiha dalan seluk tenke hakat hosi mota hafoin asesu ba villa Turiscai.
Ba Lafaek News Xefe Juventude Suku Aitemua, Bonifacio Soares informa, situasaun ne’ebé nia komunidade ho estudante sira preukupa mak mota ne’ebé difikulta sira iha tempu udan komunidade sira labele lori sira nia produtu ba merkadu no estudante sira labele partisipa prosesu aprendizajen.
“Nudar joven ida ita haree ba problema mota ne’ebé nia korrente forsa, bele ameasa estudantes, professores sira inklui komunidade sira-nia vida,” Bonifacio ba Lafaek News iha suku Aitmua postu administrativu Turiscai munisípiu Manufahi, 19/01/2025.
Tanba ne’e, bainhira mak governu tau matan ba pontes suku Aitmua, inan-aman sira tauk sira nia oan ne’ebé hakur husi mota refere hodi asesu eskola iha Turiskai villa, nune’e komunidade ho autoridade lokál organiza malu tesi au-betun latan husi mota nia sorin too sorin hodi kesi au-betin halo hanesan ponte tradisional atu estudante no komunidade sira bele ultrapasa iha tempu udan tau maka’as.
Iha fatin hanesan, Xefe Suku Aitemua Abril Martins sublina, nia parte rekoñese katak, mota ne’e hasusar duni estudantes ho suku refere atu ba asesu ba eskola, maibé nia parte esforsu ho buka maneira oinsá komunidade ho estudante bele ultapasa mota ne’e ho meius konstrui dalan provizoriu ho au-betun.
“Hanesan autoridade ha’u sente no haree katak, ne’e realidade duni hanesan ha’u nia joven ho komunidade sira hasoru liu liu estudante sira, maibé estudante sira kontinua ativu, iha prosesu aprendejazen too agora, entaun nudar autoridade iha suku ne’e ha’u buka meius orienta komunidade sira halo ponte ho au-betun nune’e komunidade labele hakur husi mota laran iha tempu udan,” dehan nia.
Xefe suku Aitemua Abril Martins rekomenda ba governu atu responde urjénsia ba problema ne’ebe ninia komunidade ho estudante sira hasoru iha suku Aitmua, inklui mos suku sira seluk hanesan Mindelu ho Manelobas.
Jornalista : Natalino Lopez
Editor : Agapito de Deus
