Lafaek News- Komandu Komponente Naval Lijeira (CNL-Sigla Portugés) komemora tinan ba dala Sanulu Resin Sia ho de’it kuda Ai Kameli ne’ebé apoiu hosi Ministériu Agrikultura no Peska (MAP).
“Ami nia partisipasaun iha ida ne’e, apoiu ai kameli oan hamutuk 30 ba komponente naval sira atu kuda iha baze naval, tanba ami haree sei iha espasu atu valoriza ita nia espésie ai-kameli iha Timor Lorosa’e,” informa xefe departamentu floresta (MAP) Fernandino Vieira de Souza, iha Komponente Naval Hera Dili, Kinta (07/01).
Reforsa nia, apoiu ne’e sei la para de’it iha ne’e maibé sei kontinua kuandu iha espasu ruma hodi fó netik biban para kuda ai refere.
“Ami espera katak, apoiu ne’e la’ós para de’it iha ne’e maibé sei iha kontinuasaun depende ba espasu ba ai horis ne’e iha,” dehan nia
Argumenta nia, diresaun ne’ebé nia lidera sempre fó apoiu ba entidade hotu konforme ba pedidu ne’ebé sira hatama hodi husu apoiu atu kuda ai ne’ebé sai icon ka primadona ba Timor Lorosa’e.
Alende ne’e iha fatin hanesan Komandante Komponente Naval, Kapitaun de Fragata João da Silva hato’o agradesimentu ba ministériu Agrikultura no peska liuliu diresaun jerál floresta nian tanba apoiu ona Ai kameli oan atu kuda iha Baze naval Hera.
Dehan nia, ai kameli hanesan Timor ninian própriu tanba ne’e entidade hotu-hotu presiza promove no próteze atu nune’e riku soin ne’ebé iha labele lakon.
“Ai-kameli sai hanesan própriu ida tanba ida nee riku soin Timor nian entaun ita presiza konserva ai horis orijen Timor Lorosa’e nian iha komponente naval Hera,” tenik nia
Jornalista: Orlando Magno
Editór : Ezequias Tomás
