Lafaek News—Domingu (Horsehik-red) (02/05/2021), tuku 5 lokraik, Oknum Polísia Nasional Timor-Leste (PNTL) ida, uza pistola tiru kanek Joven nain 3, tanba envolve aan iha konfrontu asaltu malu entre joven sira husi bairo 2 Maskariñas ho Bairu Kaikoli Dili.
Vítima ho inisiál DVDS ho idade (20), haktuir kronolójia husi akontesimentu refere katak, horsehik lorokraik, mosu konfrontu asalta malu entre joven sira husi bairu Maskariñas ho Kailoli, nune’e mos, joven husi bairu Maskariñas organiza malu ho sasan kroat hanesan katana no samurai hodi hasoru joven sira iha Kaikoli.
Bainhira Joven sira ne’e asaltu malu too postu polísia maskariñas oin, oknum ne’ebé halo hela seguransa, koko hakalma situasaun, maibé oknum ne’e uza pistola tiru hasoru joven sira husi parte Kaikoli nian, hodi hakanek ema nain tolu.
Vítima nain tolu ne’ebé hetan kanek husi bala musan mak hanesan, inisial DVDS idade (20), tiru kona iha kabás karuk, PDJC (17), polísia tiru kona borus iha kelen parte karuk, oras ne’e baixa hela iha HNGV, Ricardo ADCA (18), bala musa kona kois iha parte ulun.
“Ami hasoru sira tun mai ho armas brankas, polísia mós la tiru sira ida lori armas brankas ne’e, maibé polísia tiru fali ami ida liman mamuk,” dehan Vítima inisiál DVDS ba Jornalista iha nia rezidénsia aldeia 04 kaikoli Dili, segunda (03/05/2021).
Vítima DVDS afirma, akontesimentu ne’e mosu, bainhira nia koko atu salva hela nia kolega ida, ikus mai hetan tiru husi nia kotuk hodi rezulta kanek iha kabás parte karuk.
“Ami atu hadau kolega ida sira rasta sae ba sira nia bairo Maskariñas maibé oknum polísia ne’e tiru fali ami entaun ami konsege uza fatuk hasoru sira hodi hadau fali kolega ne’e mai,” Nia Esplika.
Iha fatin hanesan Olga de Jesus, inan husi vítima Pauleta de Jesus Carlos (17), nu’udár sasin ba insidente ne’e haktuir, oknum ne’e see pistola direta hodi tiru hasoru nia oan sira ho distánsia metru lima de’it, tanba ne’e parte família husi vítima sira ezíje justisa ba komandu PNTL atu prosesa onkum PNTL ne’e tuir lei ne’ebé vigaora iha Timor-Leste.
“Ida ne’e violasaun ba direitu ema nian, tanba nia (oknum) mai tiru loos ami nia ona de’it. hanesan inan, ami la konkorda ho hahalok hanesan ne’e, tanba ne’e tenke halo investigasaun ba Oknum PNTL ne’e tan Ami hakarak husu justisa loos hanesan horikalan ami ba polísia, maibé haruka ami fila,” hateten nia.
Nune’e mos Komandante jerál PNTL, Komisáriu Faustino da Costa relata, da-daun ne’e ekipa Servisu Investigasaun Kriminal (SIK) prosesa hela oknum polísia ne’e, hafoin remata mak sei anúnsia rezultadu ba públiku.
“Dadaun ne’e ekipa investiga hela no tempu tuir mai sei hato’o husi portavóz komandu jeral PNTL nian”, Komisariu Faustino esplika.
Jornalista : Orlando Magno
Editor : Agapito de deus
