Lafaek News—Relasiona estensaun estadu emerjénsia ba dala 13 no mós komfinamentu domisiliariu jeral iha kapital Dili no hapara atividade transporte públiku entaun susar atu hetan osan hodi responde ba nesesidade loro-loron, ho kestaun ne’e representa povu iha PN deputadu CNRT Patrocino Fernandes konsidera governu inkapasidade halo jestaun.
“Lo’os duni tenke inplementa serka sanitária no komfinamentu obrigatorio, maibé governu tenke iha kondisaun atu rekupera ema nian nesesidade loron-loron nian, tanba mikrolet sira nia atividade mak ida ne’e hodi sustenta sira nia nesesidade loron-loron, se loron_loron nia halo movimetu ho kareta mak nia han no hemu governu tenke iha ona kapasidade hodi hare’e ba situasaun hirak ne’e,” katak Bankada CNRT Patrocino Fernandes dos Reis ba, Lafaek News, iha Parlamentu Nasionál, segunda, (03/05/2021).
Nia hatutan, foin lalais iha loron 30 fulan abril motorista mikrolete balun mai para iha palasiu governu oin hodi protesta ba governu kona-ba serka sanitária ka komfinamentu obrigatóriu hodi hapara transporte públiku sira nia movimentu.
“Ne’e mak ami dehan ona governu inkapasidade atu halo jestaun ba sasan sira ne’e, tuir lolos governu iha obrigasaun atu rekompensa fila fali povu ninia nesesidade atu povu labele sai Vítima,” nia informa.
Entretantu antes ne’e liu husi reuniaun Konsellu Ministru deklara iha projetu Dekretu Governu nian kona-ba medida ezekusaun ba Deklarasaun Estadu Emerjénsia, ne’ebé efetua husi Dekretu Prezidente Repúblika nu. 24/2021, loron 28 fulan-abril, hodi hatan ba pandemia COVID-19. Estadu emerjénsia, ne’ebé renova daudaun ne’e abranje teritóriu nasionál tomak no vigora entre tuku 00:00 loron 3 fulan-maiu no tuku 23:59 loron 1 fulan-juñu tinan 2021.
Konsellu Ministru mós aprova ho alterasaun projetu Rezolusaun Governu nian ba impozisaun konfinamentu domisiliáriu jerál ba ema sira hotu ne’ebé mak hela ka oras ne’e daudaun iha hela Munisípiu Dili, ne’ebé tenke hela iha sira nia uma ka iha sira nia alojamentu temporáriu, tuku 00:00 loron 30 fulan-abril tinan 2021 no tuku 23:59 loron 13 fulan-maiu tinan 2021.
Jornalista : Rita Moniz
Asisten Editor : Pedro de Almeida
