Lafaek News—Organizasaun Noun-Governamental (ONG) Luta Hamutuk (LH), no Polísia Nasionál Timor Leste (PNTL), hatoo parabens espesial ba media hotu nia kontribuisaun liu husi publikasaun informasaun ba públiku.
Iha ámbitu komemorasaun loron liberdade imprensa ne’e, Diretór ezekutivu ONG Luta Hamutuk, José Alves da Costa, hatoo apresiasaun no parabens ba kna’ar jornalista sira tanba durante ne’e fornese informasaun di’ak tebes.
“Dala uluk, ha’u hakarak hatoo ha’u nia rihun parabéns ba Imprensas lokál, nasionál ho International hotu ba loron espesial Ida ohin, bazeia ba ha’u nia observasaun ba kna’ar media ninia liliu iha nivel nasionál la’o di’ak tebes, nakonu ho liberdade total hodi transmite informasaun ho lais ba audensia ka leitores sira,” José Alves ba Lafaek News via Messenger, Segunda 03/05/2021.
José esplika, Imprensas sira hala’o duni nian kna’ar nu’udar transmitidor informasaun iha ámbitu livre, tanba Timor-Leste mos hetan rekoñesimentu iha Asia Liberdade da media Timor Leste sai númeru dahuluk.
“Profesionais Jornalista sira, hala’o funsaun ho di’ak tebes, mezmu liberdade imprensa iha Ázia Timor Leste hetan primeiro Lugar, la signifika ita atu para de’it ka kontente de’it ona ho apresiasaun hirak ne’e, maibé media sira persija dezenvolve aan di’ak liután ba iha performa informasaun ne’ebé tenke mai ho atual, kredivel no bele responsabiliza,” Nia rekomenda.
Iha media balu dala ruma hasai títulu ne’ebé maka konvoka provokasaun ba situasaun, media sira tenke hasae kapasidade internal iha rekursu umanu hodi dezenvolve aan ba media internasional.
“Jornalista, editores tenke aumenta kapasidade lian ingles no Portugues nune’e bele transmite informasaun iha media ho lian internasional sira atu ema iha rai liur asesu ita nia informasaun bele komprende,” Diretor LH José Sujere.
Iha sorin seluk Portavoz PNTL, Superintendente Xefe Arnaldo Araujo, haktuir durante ne’e media sira servisu no halo kolaborasaun di’ak tebes hodi publika informasaun iha media imprime, Eletrónika ho online.
“Primeiru ha’u hatoo parabens ba Jornalista sira hotu ne’ebé hala’o kna’ar jornalismu nian, tuir ha’u haree durante ne’e media sira servisu di’ak tebes no sempre koopera ho ema hotu liu-liu ho PNTL no mos ha’u kongratula tebes ba media tanba sira nia jornalista haklaken informasaun kapas ho loos,” Portavoz PNTL Arnaldo apresia.
Ikus liu portavos PNTL ne’e hatoo nia apresiasaun ba jornalista sira relasiona ho selebrasaubn loron liberdade imprensa ba dala-28, maibé husu atu hadia notisia liu-liu iha parte hakerek nian oinsá públiku bele komprende lia-fuan ne’ebé jornalista hakerek
Jornalista : Orlando Magno
Editor : Agapito de Deus
