Por: Fernando de Deus Soares Martins Babo

Estudante III Ano Filosofia, ISFIT (institutu Filosofia e Teologia Fatumeta)

Introdução

Dala barak, ema barak usa verdade ne’e hanesan retórica de’it, atu dada ema nia atenção, hodi confia buat nebé sira ko’alia, mesmo que la han malu ho realidade. Ema barak mos, la brani atu ko’alia verdade, basá quando sira ko’alia verdade ne’e, hanesan ameaça boot ida ba sira nia posição. Ne’e duni, atu assegura sira nia posição, sira tem que subar verdade ne’e rasik. No prática ida ne’e, ita haré mo-mos iha ita nia Nação Timor. Ita haré katak, ohin loron ne’e verdade sai de’it ona hanesan linguagem retórica ida, tamba la hatudu evidência atu ema fiar no hetok halo ema dúvida liu tan. Tamba ne’e ita sei ba haré Descartes nia ponto de vista kona ba verdade liu husi nia teoria “dúvida metódica”, atu prova liu husi “evidência” hodi bele lori ita to’o ba verdade ida nebé aceita universalmente.

Objetivo husi artigo simples ne’e, ha’u koko atu lori ita hotu atu ba haré situação atual iha ita nia sociedade ida ne’e, basá ita labele moris de’it iha lia bosok nia laran, maibé ita precisa buat nebé concreta atu nuné ita labele sente katak ita iha hela incerteza ka obscuridade nia laran, hanesan Descartes dehan iha nia provas da verdade, nebé ita sei ba haré tuir mai. Husi artigo ida ne’e, mos laos ho ninia finalidade hakarak atu insulta ema ruma ka difama ema ruma, maibé liu-liu atu ita hamutuk halo analíse ba situação sira nebé acontece iha ita nia rain ida ne’e. Tamba ne’e, uluk liu mai ita conhece hamutuk lai sé mak René Descartes?

René Descartes no Nia Obra Sira

Naran completo mak Renato Descartes nebé conhecido ho naran Descartes, moris iha La Haye, Turrena, 31 de Março de 1596. Nia hahu tama escola iha colégio La Fléche iha tinan 1605-1613. Halao nia estudo iha colégio de Jesuita ba matéria: Retórica, Gramática, no Filosofia. Nia iha desilução oituan kona ba cultura mediéval. Tamba ne’e, nia tama universidade Poitiers, iha tinan 1616, no nia conségue hasai Bacerelato iha licenciatura kona ba Direito. Iha tinan 1618: Tuir força militar ba iha Holanda – Breda. Iha momento nebá Descartes hasoru malu ho matenek nain ida naran Isaac Boeck Man, nebé fo concelho makas ba Descartes atu continua nia estudo iha área ciência nian. Iha tinan 1619, Descartes hamutuk ho tropa sira sai husi Breda, ba fatin ida naran ULM. Husi ne’e, Nia hetan iluminação ka roman ida iha nia hanoin atu desenvolve ciência ida.

Ho iluminação nebé nia hetan, nia iha intenção atu halo viagem ou peregrinação ba Loreta, iha Itália, hodi aprende transformação ciência mágico (pensamento mediéval) nian ba ciência nebé foun iha matemática. Buat nebé nia formula “Inventum mirabile”, Katak, aprende ciência admirável no iha consciência atu produz obra ruma iha campo científico.

Iha tinan 1627, nia hakerek primeira obra ho título “Olympica”, iha latim: “Regulae ad directionem ingenuii”. Iha fali tinan 1628, nia hahu halo pesquiza da verdade. Iha tinan 1629 to’o tinan1649, Nia hakerek “Tratado da Física”, nebé koalia kona ba, o mundo da luz e o mundo do homem. Iha tinan 1637, nia hakerek ensaio ida naran “Diotrica, meteor, geométrica. Ensaio ida ne’e, mak hanaran discurso do método.  Ho discurso ida ne’e, mak lori nia sai hanesan figura hanesan Pai da Filosofia Moderno nian, tamba nia halo método foun. Iha tinan 1641, nia hakerek nia obra “Meditationes de Prima Philosophiae”. Iha tinan 1644, nia hakerek obra “Principia Philosophiae”. Iha fali tinan 1649 nia hakerek obra ikus “Paixão da alma” (Passione della anime). Iha loron 11 de Fevereiro de 1650, Descartes hakotu is iha rai Stoa. Nia mate tamba sofre moras pulmão ou TBC. Iha tinan 1667, lori fali nia ruin ba França, tau iha igreja ida naran Saint Germain des Prés, França Paris.

Verdade No Ponto De Vista René Descartes

Etimologicamente liafuan verdade mai husi lian Latim katak ‘Veritas’ significa: justiça, verdade, realidade. Iha dicionário filosofia define liberdade ne’e hanesan adequação do intelecto ao real. Katak tem que iha coerência entre intelecto ho realidade mak ita foin hetan verdade ka verdade bele hetan abut klean. Tamba ne’e, verdade ne’e tem que hatudu iha realidade. Nuné geralmente ita bele hatene ona verdade katak ko’alia lia los tuir factos nebé iha.

Descartes conhecido iha teoria dúvida metódica. Ita sei haré, oinsá Descartes hatur dúvida metódica ne’e atu bele alcança verdade. Tamba ne’e, nia la husik de’it ema atu hela ho dúvida maibé, oinsá hanorin ema atu sai husi dúvida hodi ba hetan clareza ba dúvida nebé nia iha. Nia usa dúvida metódica ne’e atu explica de’it, katak dúvida ne’e mosu tamba buat rua ne’e: obscuridade ho incerteza, nia dirige liu ba dogma tradicional sira. Iha ne’e nia considera dogma tradicional sira ne’e hanesan crise ida ba pensamento moderno, tamba sira moris de’it iha obscuridade ho incerteza, nebé la usa razão atu ko’alia verdade, maibé hakruk de’it hodi tuir ema seluk nia ordem “Descartes quer pôr em crise o dogmatismo dos filosofos tradicionais” (Reale, vol 3: P. 292).

Tamba ne’e, ba Descartes dúvida ne’e método di’ak ida nebé bele lori ita ba to’o verdade, tamba wainhira ita dúvida mak ita foin buka hatene lolos razão nebé halo ita dúvida “a dúvida quer levar à verdade. Por isso é chamada dúvida metódica, enquanto é passagem obrigatória, ainda que provisória, para chegar verdade. A dúvida leva à certeza” (Reale vol 3: P. 292). Ita haré mo-mos ona katak dúvida metódica ne’e, lori ita ba haré burus obscuridade ho incerteza, hodi hetan certeza no hatene verdade.

Descartes mos conhecido ho nia proposição ida nebé dehan “cogito ergo sum” ha’u hanoin maka ha’u iha. Tamba ne’e, ita iha ne’e atu hanoin, hanoin ne’e mak lori ita ba dúvida no hanoin ne’e mak lori ita ba prova evidência atu ita sai husi dúvida hodi to’o ba clareza atu hetan verdade. Iha ne’e, maka Descartes hatur tipo rua atu explica kona ba substância ema nian: Res Cogitans e Res Extensa. Res Cogitans ne’e atu hatudu ba ema nia razão ka espiritualidade (actividade pensante) no Res extensa atu hatudu ba ema nia corpo humano.

Ne’e duni, Descartes fo importância liu ba Res Cogitans ka ema nia razão, tamba ema ne’e ser pensante katak ema nia natureza ne’e mak pensar “se vê claramente que para pensar e preciso existir. A proposição penso, logo existo não é um raciocínio, mas intuição pura, ato intuitivo graças ao qual percebo minha existência como ser pensante. Esta existência e uma res cogitans (razão), sem nenhuma ruptura entre pensamento e ser: a substância pensante e o pensamento em ato, e o pensamento em ato e uma realidade pensante” (Reale, vol 3: P. 292). Tamba, ema ne’e ser pensante, então naturalmente ema ne’e iha desejo atu buka hatene verdade, maibé atu ba to’o verdade tem que liu husi dúvida no evidência.

Ba Descartes atu ema aceita verdade ne’e universalmente, buat importante mak tem que hatudu evidência, atu nuné bele hetan aceitação. Ne’e duni, nia hatur evidência ne’e ho provas matemática. Tamba, só matemática mak hatudu evidência nebé aceitável ka evidência universal “Qualquer outra verdade so será acolhida da à medida que se adequar ou aproximar de tal evidência. Tendo-se inspirado inicialmente na clareza e na evidincia da matemática” (Reale, vol 3: P. 292).

Descartes aplica verdade iha matemática, tamba iha matemática mak oferece verdade nebé lolos. Verdade lolos hanaran Sémina Scientiae, ou natura simplies. Verdade ida nebé ita hetan mak define nudar maneira claro no distinto, maibé precisa mos haré ba evidência nebé hatudu “A evidência consiste na clareza e distinção, as quais são os sinais da verdade das coisas, e deriva do lumen naturale que existe em todo homem” (Reale Giovanni, História da Filosodia, vol 3: P. 289). Ho ida ne’e, mak nia forma lógica foun, “lógica de invenção”. Nuné hatudu rigorosamente iha matemática tamba ita hetan buat nebé principal kona ba verdade ho número sira nebé hanaran natural simples ou verdade natural (scientiae nature) (Afonso, P. 25-26).

Exemplo ida, husi verdade nebé Descartes dehan lolos liu mak ita tem que haré husi formulação de matemática nian, basá matemática mak fo sai buat nebé real liu ka verdade absolutamente, ita haré calculação entre número 2+2, ita hatene ona katak laiha tan ona resposta seluk nebé ita atu dehan, ita hotu sei hatan = 4 (Iguala 4) (Reale, vol 3: P. 292). Descartes mos define tan buat rua (2) nebé importante atu ema bele compreende di’ak nia hanoin kona ba verdade ne’e: Intuição E Dedução.

Intuição mak actividade ita ema nian. Buat nebé ita imagina ka hanoin hela, mas la consége atu fo sai  ka atu dehan sai (laos haluha). Maibé wainhira ita hakmatek ona mak foin hanoin hetan, Descartes mos hatutan liu tan katak pensamento ema nian mosu hanesan iluminação. Iluminação ne’e acontece wainhira ita nia kakutak hakmatek, ita la ocupado mak foin hanoin atu hetan buat nebé la consegue ita fo sai ne’e. Iha momento ne’e, mak ita facilmente bele distingui ba buat nebé ita bele conserva no exclui buat nebé ita la precisa ou dúvida sira seluk.

Dedução hanesan inumeração nebé nia hanaran procedimento mental. Tuir Descartes, dedução ne’e nia compreende hanesan “movimento continua interrupto (interromper) do pensamento que intuio com evidente em cada coisa” (Reale, vol 3: P. 292). Ne’e mak foin bele dehan “filósofo na filosofia”, ou liafuan seluk dehan, intelecto percebe em maneira claro e distinto. La considera hanesan essência maibé, nia dehan, “primeiro semente da verdade que está na inteligência humana”. Katak, verdade ne’e iha tiha ona ita nia kakutak (ideia tuir Platão nian).  Intelecto no dedução atu lori ita to’o iha ideia certo verdade nebé caracter clara e distinta, ne’e laos verdade nebé ema antiga sira dehan ‘essência das coisas’, nebé trata iha metafísica maibé verdade, primeiro sempre da verdade no intelecto humano.

Método nebé atu usa hodi prova evidência ne’e, tem que hatur iha recta razão atu nune’e ema hotu-hotu bele aceita verdade, tamba ne’e buat importante ba Descartes mak atu ba to’o verdade ne’e, tem que liu husi prova ho recta razão hodi julga didiak atu bele distingue ida nebé mak verdadeiro no ida nebé mak falso “Aquilo a que esse metodo conduz e no qual se fundamenta é a razão humana ou aquela reta razão (bona mens) que pertence a todos os homens […] é a coisa mais bem distribuida no mundo. O que é tal reta razão? A faculdade de julgar bem e distinguir o verdadeiro do falso é propriamente aquilo que se chama bom senso ou razio, [e que] é naturalmente igual em todos os homens” (Reale, vol 3: P. 294)

Prática Da Verdade Iha Timor Leste

Ita ema ne’e naturalmente ser pensante, tamba ne’e ita ida-idak, tem que usa didiak ita nia pensar hodi avalia ita nia realidade nebé la’o hela, atu nune’e ita bele sai husi dúvida sira nebé ita iha, hodi alcança verdade nebe ita hotu hakarak haré. Tamba ne’e, ita precisa hatur ita nia dúvida ba buat nebé iha hela obscuridade ka incerteza nia laran. Tuir ha’u nia observação, buat nebé ha’u considera hanesan incerteza, nebé la’o hela iha ita nia rain mak Incerteza Política no obscuridade nebé la’o hela iha ita nia rain mak Existência Covid 19 nian iha ita nia rain. Concerteza Covid 19 ne’e existe iha mundo no oho ema barak, maibé iha Timor Covid 19 halo ema hotu dúvida. Tan sá los? Iha ne’e, ita sei usa dúvida metódica Descartes nian atu ita bele hatene verdade husi dúvida sira ne’e.

Ohin loron, ita observa katak iha ita nia Nação Timor, ita metin hela iha dúvida ida nebé la lori ita sai ka la iha método ida nebé atu lori ita sai husi dúvida ba to’o certeza hodi haré hetan verdade ne’e. Tamba ne’e ita precisa tebes usa dúvida metódica Descartes nian atu ita sai husi ita nia dúvida ne’e. Basá ohin loron ne’e ita moris hela iha dogmatismo tradicional nebé hafalun hela ita iha obscuridade ho incerteza. Ita nia Estado moris iha incerteza política, tamba la iha política ida nebé certeza atu lori moris di’ak ba Povo. Povo sira mos moris hela iha incerteza da vida tamba falun an hela iha obscuridade nia laran. Buat sira ne’e, acontece tamba ema la brani ko’alia verdade no prática verdade ne’e. Ema la iha coragem atu prova verdade ho evidência tamba tauk lakon nia posição. Ita hotu hela de’it iha dúvida. Liderança sira mos tauk atu ko’alia verdade, afinal, verdade ne’e buat nebé justo, real no sincéro, no buat nebé lori felicidade profunda.

Doutor sira mos hanesan, perante calamidade Covid 19, sira la usa evidência nebé credível atu hetan aceitação hodi lori Povo sira sai husi dúvida ba Covid 19. Maibé, tan sira la usa evidência hodi explica didiak dúvida ne’e, maka halo Povo confusão hodi hamosu dúvida tamba sira haré hela doutor sira falun an iha obscuridade, tamba ne’e facil liu ba Povo sira atu contra protocolo saúde nian, no hahú tauk ona atu ba consulta iha hospital, tamba ema nebé moras babain mos ba hospital hetan Covid.

Doutor sira defende verdade ciêntifica sim, maibé verdade ciêntífica mos la bele halai ses husi realidade katak verdade científica ne’e tem que iha adequação ka han malu ho ralidade, sé lae sei la alcança verdade universal, tamba verdade científica la han malu ho realidade. Ita nia caso positivo aumenta, maibé provas ka evidência ne’e la forte, tamba covid ne’e quando kona fen, laen mos tem que kona ona; tamba sira nain rua hela hamutuk, toba hamutuk no han hamutuk. Doutor sira lori sira nebé detecta ba sulan iha quarentena mos butuk malu de’it no la kleur sira di’ak hotu fali ona. La hemu aimoruk mos bele di’ak ka?

Tamba ne’e, labele tauk atu ko’alia verdade, tamba verdade sai hanesan valor nebé boot, no ita quando hatoman an ko’alia verdade ita sei manan buat hotu no ita sei hetan ksolok. Verdade bele hametin nafatin ema nia relação nudar maun no alin, maibé dalaruma mos ema halerik ba lia los, ema ida-idak exige ninian, la hatene tamba sá? Haré ba realidade nebé hatudu mai ita nia nação doben Timor-Leste ida ne’e, Povo barak mak hakilar kona ba lia los, maibé dala wain ema boot sira hamout Povo nia lian, soe le’et de’it no la rona Povo nia halerik, hanesan ema sira nebé iha tilun maibé la rona, haluha tiha katak ita ukun rasik an ne’e, laos ho sacrificio bé Povo doben halo ba rai ne’e? Povo barak mate tamba de’it buka lia los ba rai doben ida ne’e.

Tamba ne’e, ikus mai tan de’it ho arrogância nebé ema hatudu, hamosu problema oi-oin nebé ita hotu hatene no acompanha durante ne’e iha rai doben ida ne’e. Mais pior é que ema boot sira han malu tan de’it la fiél ba malu no hakarak defende rasik nia lia los, nuné Povo ki’ik sira hetan sofrimento ba hahalok sira hanesan ne’e. Buat sira ne’e, halo ema sente nia an hanesan estrangeiro iha nia rai rasik, ema Nação seluk mos haré situação ida ne’e hakfodak ba actos  hirak ne’e, que vergonha? Em vez de, la tur hamutuk hodi buka solução nebé di’ak para Povo labele terus tan ba rai ne’e, ao contrário hamosu fila fali babilónia foun ida iha rai ne’e, Paulo Freire acresenta nia diáletica hanesan dalan di’ak atu tur hamutuk hodi halo discussão, nuné bele hetan verdade nebé lolos, hanesan ita Timor oan nia cultura karik tur hamutuk iha biti-bot ka nahe biti-bot hodi tur hamutuk atu nuné bele resolve problema sira hotu nebe ita hasoru.

Ita haré ba realidade ohin loron, iha ita nia sociedade Timor-Leste, buat ida fiar malu, rona malu, simu malu, tatoli lia los ba malu, no sentido buat hirak ne’e iha ita nia sociedade ohin loron ema la halo ona. Povo balun mak sei hakilar hodi husu governo ko’alia lialos, hodi dehan buat nebé los, no governo cuek ba Povo kiik sira nia lia los, rame-rame husu malu sé mak atu rona sé? ho tenção política hirak ne’e hodi hamosu pergunta mai ita onde está a verdade?

Lian Mak Taka

Los duni hanesan ita hotu haré iha ciência matemática nian, ita bele dehan “busca da verdade” enquanto buat nebé la los no seidauk los, ita precisa usa ita nia racíocinio atu hetan buat nebé los, basá husi matemática prova ita nia racíocinio ikus mai hetan verdade nebé los tuir matemática nian. René Descartes aplica método de dedução matemática no campo de filosofia hodi nuné bele desenvolve ideia nebé clara e distinta. Ita haré realidade iha ita nia rai Timor Leste, ema barak questiona kona ba verdade, Povo sira hakilar lia los, governo sira defende lialos. Verdade ne’e iha los nebé?

Tamba ne’e, verdade nebé lolos sai husi ema nia ação nebé concretiza iha valores lor-loron nian, basá atu hetan verdade precisa ema tenki ko’alia tuir buat nebé factos ka realidade. Dala barak ema questiona ita liu husi ita nia maneira sira, hanesan ko’alia, hahalok sira no buat nebé ita hatudu iha ita nia moris lor-loron nian. Maibé, ita ko’alia konaba buat nebé verdade, absolutamente ita haré liu ba iha Ai Cruz Santa nebé hedi ita nia Na’i Jesus Cristo, nebé luta makas ba verdade to’o ikus mai ema boot sira Judeia nian lori lia bosok hodi saran Nia ba mate. Maibé buat ida lia bosok ne’e sei la sai permanente, basá buat hotu sei hatudu iha loron ikus, tamba ne’e lalika tauk atu ko’alia buat nebé mak los, basá lori lia los ita sei hetan dalan los no sei manan iha justiça rai nian no lalehan nian.

Ikus, ha’u taka ho filosófo principal ida naran Platão nebé hateten nuné: “No one is more hated than the one who speaks the truth…”

Nb: Artigu Simples ida ne’e rejultadu travalho (oinsa hakerek artigu) materia Seminar I, iha Fakuldade Filosofia ISFIT, Ho Dosente, Elidio Agusto Guterres.