Lafaek News—Komunidade aldeia Lemorana suku Dare, postu administrativu Vera-Krúz, munisípiu Dili moris ameasadu ho mota Maloa ne’ebé sobu rai monu besik ona populasaun sira nia uma oin ho metru 5.
Asuntu ne’e hatoo hosi abitante Oscar de Andrade ba lafaek news iha aldeia Lemorana kinta (29/02/2024), hodi husu Institutu Jestaun Ekipamentus (IGE-sigla Portugés), apoiu ekipamentu suru sai lalais rai-henek iha mota refere ne’ebé nakonu ona besik komunidade sira nia oin hodi bele hadook risku iha tempu udan.
Abitante haktuir, foin lalais udan tau makas mota refere tun ho korente forsa sobu rai-henek ne’ebé mákina suru hada hela iha mota ninin hosi tinan 2021-2022 nian, maibé foin lalais bee sobu hotu no mota halai besik da-daun on aba komunidade sira nia uma oin, posibilidade mota sei sobu uma hirak ne’ebé besik iha mota ninin, bainhira la suru sai lalais rai-henek ateru iha mota ninin.https://www.lafaeknews.tl/lemorana-mota-lori-ema-ida-ho-uma-10-lakon/
“Agora ne’e mota halai besik los ona ba komunidade sira nia uma oin, se IGE la mai suru lalais rai-henek butuk ba mota ninin, mota ne’e tun agora bele lori uma ho ema dal aida de’it,” haktuir abitante aldeia Lemorana Oscar de Andrade.
Iha sorin seluk, xefe aldeia Lemorana Alice de Jesus, husu governu atu tau atensaun másimu ba Mota Maloa iha tempu udan boot, realidade iha 4 de Abrik liu ba, mota lori populasaun sira nia uma too lori tan ema ida (membru PNTL) la salva vida, akontesimentu tinan kotuk fanun governu atu atensaun sériu ba populasaun Lemorana hodi hadook risku ba sira nia moris loro-loron.
“Iha tinan kotuk 4 Abril, mota lori ha’u nia komunidade ida mate, lori uma lubuk ida, ha’u husu governu atu atensaun, Haruka ekipamentu tratór mai suru ona rai-henek mota laran ne’ebé atu tetuk da-daun ho komunidade nia hela fatin, se agora mak udan boot mota tuun populasaun bele risku ba sira nia vida,”Alice konfirma.
Observasaun lafaek news iha terenu nota, mota sobu rai besik ona komunidade sira nia uma oin, iha parte aldeia Terus nain suku Vila-Verde nian no aldeia Lemorana suku Dare, populasaun utiliza mota hanesan estrada no iha tempu udan hasusar labarik sira asesu ba eskola, entretantu notisia ne’e pubika redasaun lafaek news seidauk konfirma Instituto Jestaun Ekipamentu.
Ekipa Lafaek News
Editor : Agapito de Deus
