Lafaek News—komunidade aldeia Tane-Mutu Suku Kuluhun, postu administrativu Kristu-Rei, munisípiu Dili, ho inisitiva halo kobransa kada uma kain ida $ 2.00 hodi sosa rai-henek taka estada kuak diresaun Kalifornia ba Taibessi.
Inisitiva husi joventude aldeia Tane-Mutu, joven inklui ferik katuas sira mobiliza malu taka estrada kuak no sosa rai-henek liu husi osan kontribuisaun kada uma kain hodi ateru ba dalan kuak ne’ebé dezde mandate oitavu governu la tau atensaun too ohin loron.

Fransisca da Costa hanesan komisaun organizadora ba atividade voluntáriu ne’e, haktuir ba lafaek news katak difikuldade ne’ebé durante ne’e komunidade aldeia Tane-Mutu hasoru mak estrada difikulta movimentu trasporte no mos movimentu estudante sira susar atu la’o ba eskola.
“Haree ba problema hirak ami hamutuk ho joven sira no komunidade foti inisiativa rasik hodi hadia ami nia estrada ne’e atu nune’e ami bele fasilita movimentu ema no mos trasporte públiku sira la’o ho diak no seguru,” Francisca da Cota informa ba lafaek news iha aldeia Tane-Mutu suku Kuluhun.
Tuir nia, orsamentu ba atividade hadia estrada ne’e kontribui husi komunidade aldeia Tane-Mutu rasik la hetan apoiu ruma husi Estadu ou kompania ruma.
“Ami rasik mak halo kobransa sai tama iha komunidade sira uma, kada uma kain fo tuir sira nia kbi’it de’it ami la obriga, maibé komunidade sira ho fuan boot koopera tebes ho ami hodi fo apoiu atividade voluntáriu ne’e,” nia sublina.
Komunidade aldeia Tane-Mutu, husu ba governu foun ne’ebe mai da-daun tau-matan esteda ne’e iha Dili-laran liu-liu estrada aldeia Tane-Mutu suku Kuluhun nian, tanba estrada iha aldeia refere kondisaun la diak no difikulta tebes movimentasaun transportes públikus.
Observasaun lafaek news nota, orsamentu hetan kontribuisaun husi komunidade aldeia Tane-Mutu hamutuk $.100 uza osan ne’e sosa raihenek no mos hodi selu trasporte ne’ebe tula rai-henek ba mai fakar ba estrada ne’ebé kuak iha klaran provoka bee nalihun hanesan debu iha estrada klaran.
Jornalista : Mateus de Deus
Editór : Agapito de Deus