Lafaek News—Autoridade Protesaun Sivil distribui kareta ho marka Hiux (10) tanke (6) no auto-eskada (1) ba munisipiu (11) hanesan, Aileu, Ainaru, Manufahi, Bobonaru, Liquisa, Ermera, Lautem, Vikeke, Manatutu, Atauru inklui Raeo, entrega ba komandu operasaun munisipiu sira atu kombate inséndu iha sosiedade.
Iha serimonia entrega ekipamentu hirak ne’e, Joaquim Gusmão Martins husu komandu Autoridade Protesaun Sivil munisipiu sira tenke responsabiliza kareta hirak ne`ebe ohin distribui kada munisipiu hodi tulun komunidade sira iha situasaun emerjénsia.
“Hanesan ita hotu hatene katak, ekipamentus ne’ebé ita nia bombeirus sira uza liu ona tinan sanulu, tan ne’e kondisaun la permite atu uza hodi halo servisu, ita halo akizasaun ba kareta foun hodi bele moderniza diak liután ita nia ekipamentus ba iha bombeirus hodi bele atende lalais komunidade, tanba ne’e ita hotu-hotu iha ne’e sai hanesan sasin ba iha modernizasaun ekipamentus hanesan kareta ba iha korpu bombeirus iha territóriu tomak, liu-liu iha munisipiu 11, hanesan ita hatene iha munisipiu tolu mak ita fahe ona kareta hodi reforsa ona sira nia servisu iha munisipiu hanesan Suai, Baukau no Dili,” katak Quim Gusmão.

Governante ne’e relata, iha tinan 2021 APS konsege halo akizisaun ba kareta 7, rua auto-komandu no kareta espesial 5, iha tinan ida ne’e halo akizisaun ba kareta hamutuk 17, ida ne’e hetan komitmentu bo’ot husi oitavu governu konstituisional nomós komitmentu ida ne’ebé primeiru ministru tau importánsia ba dezenvolvimentu iha protesaun sivil hanesan pilar terseiru seguransa nasional.
“Kareta sira ne’ebé iha tinan kotuk ita fó ba munisipiu Kovalima, tanba ita hatene katak munisipiu Kovalima iha hela atividade perfurasaun mina iha rai maran, tanne’e ita mós tenki apoiu ekipamentus ba bombeirus sira karik akontese buat ruma iha ne’eba, atu nune’e ita mós iha kondisaun minimu hodi suporta mós sira atu ajuda kompaña sira ne’ebé mak iha ne’eba hodi halo aktividade profurasaun mina iha fatin refere,” Quim afirma.
Tuir nia dehan, Iha munisipiu Baucau hetan doasaun husi Embaixada Japaun iha Timor-Leste ne’ebé fó apoiu ba Baukau ho ekipamentus hanesan kareta hodi fasilita servisu bombeirus, nune’e mós iha Dili PAS fahe ona ekipamentus kareta ba sira hanesan mós ho munisipiu seluk.
“Tinan ne’e ita ho orsamentu estadu ita mós halo akizasaun ba ita nia komanante operasional sira ne’ebé seidauk hetan kareta hamutuk 21, tan ne’e ita entrega hotu ona ba munisipiu sira, liu-liu komandante operasional munisipiu sira, no dau-daun ne’e iha kareta 7 mak iha ne’e hela hodi aloka ba diresaun nasional, liu-liu xefe gabinete iha diresaun nasional sira ne’ebé iha edifisiu nasional, tanba ne’e liuhusi atividade ohin loron nian hakarak mós informa ba komandu operasional munisipio sira katak, iha motorista ne’ebé sei toma konta ba kareta hirak ne’e kuidadu didiak kareta, tanba ita sosa ho osan povu nian nomós estadu nian, husu ba ita hotu iha resposablidade ne’ebé bo’ot hodi kuidadu sasan sira ne’e hodi fo atendimentu povu,” Quim Gusmão hakotu.
Jornalista : Crispin de J. Amaral.
Editor : Agapito de Deus