REFLEXÃO DIÁRIA CATÓLICO:
QUINTA, 08 DE JUNHO 2023
DOMINGO IX DO TEMPO COMUM
TOBIT 6 : 10 – 11; 7 : 1. 9 – 14; 8 : 4 – 9
MARC 12 : 28 – 34
Nai Jesus Kristu nia Evangelho tuir Saun Marcos:
Iha tempo neba, Escriba ida, mai hakbesik Nia hodi husu, “Ukunfuan uluk liu hotu mak ida nebe los?” Jesus hatan: “Ida nebe uluk liu mak: ‘Rona ba Israel. Nai, ita nia Maromak, mak Nai ida mesak. O sei hadomi Nai, o nia Maromak ho o fuan tomak, ho o nia klamar tomak, ho nia hanoin tomak no ho o nia kbiit tomak.’ Ida tuir nia mak ne’e: ‘O sei hadomi o nia maluk nu’udar o nia an rasik. La iha tan ukunfuan nebe boot liu sira ne’e.” Escriba ne’e dehan ba Nia,”Diak, Mestre. Ho lialos, Ita dehan katak Maromak ida deit; la iha tan ida seluk, Nia mesak deit. Hadomi Nia ho fuan tomak no ho hanoin tomak no kbiit tomak, no hadomi maluk hanesan o an rasik mak boot liu buat karan sunu no sacrificio hotu.” Jesus hare katak nia koalia ho matenek, dehan ba nia,”O la dook husi Maromak nia reino!” La iha tan ona nebe barani atu husu buat rum aba Nia.
Lia Maksoin!
REFLESAUN:
Sekuandu ema ida koalia dehan: nia hadomi Maromak maibe odi ninia maluk maka nia bosok-ten. (Jo 4:20) Keta haluha katak ita ema mak Imagem Maromak nian, Ilas Maromak nian. Buat ne’e Jesus sublina iha Evangelho ohin loron: ‘Hadomi maluk sira hanesan o an rasik mak boot liu buat karan sunu no sacrificio hotu.’ Ema barak nebe ninia religiaun sempre tuir regras ou lei religiaun nian em detalhe no aperta hanesan: oinsa hatais ba Igreja, oinsa regra liturgia no mos karik oinsa maneira koalia ho ema seluk, etc. Los duni katak buat hirak ne’e hotu tulun ita atu hamoris ita nia dedicasaun ba Maromak. Maibe, buat hirak ne’e hotu se la implementa ho sentimento domin, halo ho domin ba maluk sira hanesan: solidaridade, sensibilidade, toleransia no respeito ba ema nebe religiaun la hanesan; ninia folin la iha, la soi iha Maormak nia futar oin. Ema barak balun sente katak ninia religiaun mak diak liu sira seluk nian, ema balun sente katak sira santu liu maluk sira, piorr liu tan to’o hatun maluk sira no halo sira sai inimigo.
Loron ida ohin, Jesus fo hanoin ita kona ba saida mak esensial liu iha ita nia moris nu’udar Maromak nia oan sira katak hadomi maluk sira no hadomi Maromak. Haraik tulun ba kiak no terus sira, hakbesik ba sira nebe moris mesak no isoladu, fo tulun ba sira nebe moras no difisiente ou difabel sira ou rona sira nebe laran la hakmatek tanba problema oi-oin; buat hirak ne’e mak hanesan sacrificio dan karan folin boot iha Maromak futar oin. Saun Paulo fo hanoin katak liafuan furak-puitis, liafun Espiritu nakonu ho biit/magis no mos iha matenek atu koalia nu’udar profeta maibe se la ho domin nebe mai husi ita nia fuan; sei sai saugati no la iha folin. Buat hotu sei lakon so deit domin/caridade tanba domin no caridade mak Maromak rasik.
Orasaun:
Aman Maromak laran diak, hanorin ami atu ami bele hadomi ami nia Maromak no maluk sira ho lolos iha ami nia moris lor-loron. Ami harohan ne’e hodi Nai Jesus Kristu nia naran hamutuk iha Espiritu Santu. Amin!
“VIVAT DEUS UNUS ET TRINUS IN CORDIBUS NOSTRIS ET CORDIBUS HOMINUM”
(Atu Maromak Santissima Trindade moris iha ita ida-idak nia fuan no iha ema hotu nia fuan)
Batugede, 08 de Junho 2023
Pe. Richardo Pasang, SVD