Lafaek News–Kandidatu Prezidente Repúblika, Premiadu José Ramos Horta, ho Kay Rala Xanana Gusmão, partipisa misa domingu ramus iha igreja Katedral Bauaku molok hala’o atividade polítika husi Baukau ba Lautém
Administrador apostóliku Dioseze Baucau Pe. Alipio Pinto Gusmão, iha nia omilia ko’alia selebrasaun domingu ramus lori ema fiar nain tomak ba reflexaun ida profunda kona-ba Kristo nia gloria no domin.
Administrador Apostoliku, dioseze Baukau hatoo omilia ne’e ba sarani sira iha igreja katedral Santu Antonio Baucau, domingo (10/04/2022), hodi dehan Jesus Cristo maromak lolos, la hatudu an hanesan maromak maibé haraik an nu’udar atan too saran an ba mate.
Cristo nia gloria no paixaun ne’ebé labele haketak, tanba maromak nia laran luak, Cristo simu gloria no paixaun atu lori salvasaun ba umanidade, Iha Krúz mak Maromak hatudu kbiit makas liután tanba iha Cruz mak nia mate no moris hias,’’ Nailulik ne’e hateten.
Hodi dehan, ko’alia kona-ba paixaun Cristo nian lori realidade ne’ebé ema halo iha moris hodi ladook husi krime ka hahalok aat, haretus ema seluk husi ne’e ema fiar nain tenke konsienta katak tamba nia hashalok aat mak kristu terus no mate atu hetan hikas gloria husi aman Maromak tamba manan ema nia moris.
Liturjia ohin konvida ita atu haraik an hanesan Cristo hodi halo rekonesimentu ba ita nia moris atu moris dook husi violensia, hakribii hahalok at no fila ba dalan los,” nia dehan.
Administrador apostóliku ne’e esplika, iha moris dalaruma ema sei foti no tane malu hanesan liurai boot, maibé keta haluhan iha momentu balun sei simu terus, tamba ódiu no vingansa, maibé ne’e hotu hanesan ema fiar nain tenke lori hodi hakat ho esperansa ba moris foun.
Ita simu terus hotu ho fidelidade ba Maromak ita sei simu gloria iha moris tomak, husu atu sarani sira kontinua moris ho espiritu haraik an nian hodi simu semana santa ho ksolok no fiar iha Maromak,’’ Nailulik ne’e hakotu.
Jornalista : Ana Romana
Editor : Agapito de Deus
