Lafaek News-(Lautém)-Populasaun munisípiu Lautém husi parte tasi Laivai too Tuluala Lautém ho Mehara husik hela labarik kiik ho ferik katuas sira ne’ebé labele la’o husik hela iha uma nadodon ho kareta ho motor sura labele konsentra hotu iha kampu futebol eis asrama 745 hodi rona komisiu polítika husi kandidatu Prezidente Repúblika José Ramos Horta ho Kay Rala Xanana Gusmão.
Kampu futebol 745 nia luan ho naruk la’o husi ninin too ninin sorin presiza hakat ho tempu minutu 25, maibé iha kampania aberta kandidatu númeru 1 ne’e hakat de’it pasu ida la di’ak, ko’alia la rona malu, tanba militantes husi partidu CNRT, PD, Frente-Mudanca, PUDD, PDRT, PST, PDC, PSD, ASDT, FRETILIN no Partidu Repúblikanu (PR), inklui movimentus oi-oin konsentra hodi partisipa iha kampaña aberta kandidatu José Ramos Horta ho Kay Rala Xanana Gusmão.
Kampania aberta ne’e hahú iha oras 15:23, molok hahú Premiadu Nobel ba Paz atual kandidatu ba Xefe Estadu, José Ramos Horta tara kedas tais ida ba Prezidente Partidu Demokrátiku enjeneiru Mariano Assanami Sabino no hakat kedan ba palku leten hodi dirije minutu selénsiu ho lian Fataluku Lautém nian.
Koordenador partidu CNRT, Albino dos Santos, hateten ho lian Fataluku katak, Lautém prontu ona hodi lori José Ramos Horta ba Aitarak-Laran iha ronde daruak iha eleisaun loron 19 fulan Abril.
Albino mós hatoo agradesimentu boot ba povu Lautém ne’ebé fo ona votus ba kandidatu José Ramos Horta iha primeira ronde ho rezultadu votus ne’ebé barak, tuir lolos Ramos Horta manan maioria iha Lautém iha ronde dahuluk, maibé labele konsege tanba iha tempu ne’ebá kandidatu prezidente repúblika hamutuk 16 kedan.
Hodi dehan, rezultadu husi eleisaun ronde dahuluk nian lori Ramos Horta ho votus ne’ebé barak liu maske la atinje bareira tuir lei haruka, iha sorin seluk Lú Olo ho votus ne’ebé natoon hodi kontinua hadau malu kadeira Prezidente Repúblika ihan segundu ronde, povu sei deside iha loron 19 fulan Abril, povu Lautém se fo votus maioria ba kandidatu númeru 1 José Ramos Horta.
Ha’u hatoo obrigadu ba povu Lautém ne’ebé fo ona votus barak ba maun Ramos Horta iha primeira ronde barak tebes, entaun ita sei vota dala ida tan iha loron 19 Abril Lautém tenke fo hotu votus ba Ramos Horta hodi ba Prezidente Repúblika hodi hadia ita nia konstituisaun hatur iha fatin no hadia fali imajen Timor nian iha mundu internasional nia matan,’’ afirma Albino dos Santos ba apoiantes José Ramos Horta iha kampu futebool 744 Lospalos, domingu (10/04/22).
Albino sublina, Timor Leste ohin loron iha hela situasaun ekonomia ne’ebé la estavel, presiza prezidente repúblika ida hanesan José Ramos Horta ne’ebé iha esperiensia internasional no diplomata senior iha mundu hodi ko’alia bei-beik ho governasaun foun hodi renormaliza ekonomia rai-laran no dada investor husi liur mai loke kampu servisu iha rai laran ba joven sira.
Ha’u husu ita boot sira labele hili sala, hili maun José Ramos Horta hodi lori nasaun ba oin hodi hadia povu nia moris,’’ Albino hakotu.
iha okaziaun polítika ne’e ekipa susesu eis kandidatu Prezidente Repúblika Jeneral Lere Anan Timur nian, Fernando Horacio, deklara apoiu kandidatu Prezidente Repúblika José Ramos Horta, hodi manan maioria absolutamente iha munisípiu Lautém iha eleisaun ronde daruak loron 19 fulan Abril.
”Ha’u mak ekipa susesu eis kandidatu jeneral Lere Anan Timur iha eleisaun primeira ronde, maibé iha segundu ronde ne’e ita hotu hili maun José Ramos Horta hodi ba tuur iha Aitarak-Laran hodi hadia ita rain lori Timor ba mundu no mundu mai Timor,” katak Fernando Horacio.
Observasaun lafaek news nota apoiantes no simpatizantes kandidatu José Ramos Horta hakilar ho asaun dame kontente rona diskursu politika husi kandidatu numeru 1 ne’e, partisipa iha kampana aberta diskursu dahuluk husi koordenador partidu CNRT Lautém, tuir Prezidente Partidu Demokrátiku Mariano Assanami Sabino no tuir kedan diskursu politika husi kedan José Ramos Horta, kampania ne’e hetan observasaun direta husi observador nasional no internasional inklui STAE ho CNE inklui asegura seguransa husi PNTL munisípiu Lautem.
Jornalista : CE. Lautém
Editor : Agapito de Deus
