Lafaek News- Vise-Ministru Saúde Operasionalizasaun Ospitál (V-MSOO), Flávio Brandão Mendes de Araújo husu Diretora Ezekutiva Ospitál Horex Baucau tenke kuda ai-oan iha areadores hodi hafurak ambiente Ospital Rejionál Horex Baukau.
“Ospitál rejionál horex Baucau bele akumula pasiente barak ho atendementu ne’ebé di’ak, maibé tenke kuda ai-oan, atu nune’e fó mahon ba ambiente iha ospitál ne’e rasik, tanba pasiente sira presiza hola anin fresku bainhira sira hakarak tur iha aredores sira ne’ebé mak ita iha no ohin ha’u ko’alia ona ho Diretur Ezekutivu Ospital tenke kudu ai-oan iha ospitál ne’e rasik, atu nune’e fó mahon ba ita, tanba ne’e mak diretur aseita katak sei kuda ai-oan iha areadores ospitál rejionál ne’e rasik iha tempu badak,” Vise-Ministru Saúde Operasionalizasaun Ospitál (VMSOO), Flávio Brandão Mendes de Araújo ba jornalista iha ospitál horex Baukau,
Sorin seluk Direktur Ezekutivu Ospital Horex Baucau, Claudino Ximenes haktuir katak, ospitál rejionál horex Baukau rai ida ne’ebé ateru ne’e la’ós metan, maibé rai mutin, tanba ne’e sira buka dalan oinsá atu kuda ai oan iha aredores ospitál ne’e rasik, la moris, atu nune’e hodi fó ba ambiente ospitál horex Baucau.
“Ami sei organiza membru hotu iha fatin ida ne’e atu kuda ai-oan iha tempu badak iha aredores ospitál laran, tanba ita haree ai ne’ebé moris ne’e kuaze tinan 10 ona ami kuda iha fatin ne’e, maibé kuaze ai ki’ik barak ma kami kuda iha ne’e ema naok hotu no kuaze ai-oan balun animal sira estraga mak estraga, alende ne’e mós bee laiha atu rega ai-oan sira ne’e, bainhira iha tempu bailoron naruk hanesan ne’e ai-oan sira ne’ebé ami kuda ne’e kuaze mate hotu”, Nia informa.
Nia parte konsiente katak, maske ospitál rejionál horex Baukau iha ambiente ne’ebé mós no seguru, maibé laiha ai mahon ida hodi helik pasiente sira iha tempu loron manas, espera katak udan monu ami sei organiza malu hodi haree ai-oan sira ne’ebé mak fó mahon ne’e atu kontinua kuda iha aredores ospitál ne’e rasik, importante mak ita hotu iha responsabilidade ba amibiente ne’ebé mós no seguru ba saúde, Claudino Ximenes, hakotu.
Crispin de J. Amaral
Editor : Agapito de Deus
