Lafaek News (Baucau), 19 Agostu, 2022 – Enkaregadu Negósiu Embaixada EUA, Tom Daley, Diretora Misaun USAID, Zema Semunegus, no Ministra Saúde Odete Belo halo inaugurasaun ba fasilidade izolamentu foun ida iha Ospitál Referál Baucau. Projetu ne’e dezenvolve ho apoiu husi Estadus Unidus liuhusi Ajénsia Estadus Unidus ba Dezenvolvimentu Internasionál (USAID) no Komandu Indo-Pasífiku Estadus Unidus nian.
Ha ‘u hakarak agradese Ministra Saúde ba ninia kooperasaun diak iha konstrusaun projetu ida-ne’e nian,” tenik Enkaregadu Negósiu Embaixada EUA, Tom Daley. “Ema sira ne’ebé hela iha munisípiu Baucau bele haksolok tanba sente katak fasilidade ne’e ajuda kombate COVID-19 no hametin seguransa saúde iha tempu naruk. Projetu ne’e nu’udar ezemplu importante ida kona-ba oinsá ita nia parseria bele hakat ba oin hodi luta hasoru COVID-19 no hadi’a Timoroan nia moris.”
Fasilidade izolamentu ne’e nia papél esensiál tebes hodi prevene COVID-19 iha rejiaun ida ne’e, ne ‘ebé kompostu husi ema besik 300.000, hodi reforsa operasaun ospitál nian sira no hamenus tranzmisaun virus. Fatin izolamentu ho medida 142 metru kuadradu ne’e, inklui fatin ba enfermeiru ida, área ida ho kama neen, no sala ida ho kama rua ba presaun negativu. Sala presaun negativu ne’e prevene kontaminasaun entre sala sira no asegura pesoál saúde sira atu halo tratamentu seguru ba pasiente sira ne’ebé presiza liu atensaun.
Dezde pandemia ne’e hahu, Estadus Unidus serbisu hamutuk ho Governu Timor-Leste hodi fornese vasina Pfizer doze liu 200,000 no millaun $7.4 iha asisténsia krítiku hodi kombate COVID-19. Estadus Unidus halao hela abordajen abranjente ida hodi hapara pandemia ne’e iha mundu tomak, hodi hamenus impaktu husi COVID-19 ba ema no sosiedade no hametin rekuperasaun globál. Iha tinan 20 ikus ne’e, Estadus Unidus liuhusi USAID fornese ona liu millaun $320 inklui liu millaun $20 iha setór saúde ba Timor-Leste hodi hametin governasaun no haluan prosperidade. remata
