Lafaek News—Cruz Vermelha Timor Leste (CVTL), 19 Juñu 2023, selebra loron Juventude Produtivu ka JUPRO 2023 tinan ne’e hala’o iha aldeia Darasula Suku Gariuai postu Baukau-Villa munisipiu Baukau akumula joven CVTL voluntáriu husi filial 12 ho RAEOA hodi demonstra talentu orijen liu husi dansa no fashion kultural.
Eventu JUPRO 2023 ne’ebé CVTL selebra iha Darasula Baukau, ba tinan ne’e selebra on aba da-haat no, eventu hala’o tinan-rua dala ida, tuir planu tinan rua mai oin sele realiza akampamentu iha munisípiu Lautem.
Sekretariu Jerál Cruz Vermelha Timor Leste, Luis Pedro iha nia entrevista hateten, objetivu husi akampamentu ne’e mak oinsá juventude bele partilla informasaun entre juventude husi filial sira ho nune’e mós juventude sira ne’ebé husi nasaun seluk marka prezensa iha atividade ne’e, transforma situasaun ida ne’e hodi sai influénsia ba juventude sira seluk.
“Objetivu lolos, oinsá sira bele partilla informasaun entre juventude husi filial sira ho nune’e mós juventude sira ne’ebé mak husi nasaun seluk mai hodi marka prezensa iha atividade ne’e, akampamentu ne’e ho tema asaun humanitaria ne’ebé mak efetivu liu no sustentabilidade, ne’e signifika asaun humanitariu ne’ebé mak iha efetividade ne’ebé bele fó influensia ba juventude sira selu-seluk no oinsa juventude sira ne’e bele transforma informasaun sira ne’e kontinua fahe ba Juventude sira iha komunidade atu bele iha sustentabilidade ba iha future,” katak Sekjer CVTL Luis Pedro.
Iha fatin hanesan Sekretariu Jerál Juventude no Desportu (SEJD), David Tomas de Deus reforsa, akampamentu ne’e SEJD apoiu tebe-tebes ba iha CVTL, tanba liu husi atividade hanesan ne’e bele promove joven voluntáriu ne’e barak liután nune’e sira mós sai parte solusaun ba iha problema ne’ebé mak sosiedade sira infrenta.
“Esperiénsia ne’ebé iha hodi fahe ba iha juventude sira seluk tanba sira mai ne’e ho munisípiu ne’ebé mak lahanesan inklui nasaun balun ne’ebé mak partisipa iha atividade ne’e, nune’e esperénsia ne’ebé mak sira iha fila husi atividade sira bele kontinua servisu voluntáriu ne’e ho di’ak iha komunidade,” katak SEJD David Tomas de Deus.
Sekretariu Jerál Juventude no Desportu ne’e mós deklara iha nia diskursu sei fó hatene ba iha governu ne’ebé mak sei ba atu bele kontinua fó apoiu nafatin ba iha atividade CVTL nian ne’e, tanba atividade ne’e parte SEJD haree ezemplu hanesan foin lalais inundasaun mosu grupu voluntáriu Juventude CVTL partisipa masimu tebetebes hodi ajuda komunidade sira ne’ebé infrenta problema.
Governante ne’e mós husu ba iha Juventude CVTL ne’ebé mak partisipa iha akampamentu ne’e uza didi’ak oportunidade ne’e, aproveita didi’ak, aprende fahe esperiénsia ne’ebé mak juventude sira iha ba kolega sira seluk nune’e fila implementa iha futuru.
Entretantu atividade ne’e suporta husi doadores internasional kompostu husi Cruz Vermelha Korea Sul, Austrália, Singapura, Italiano, inklui apoiu husi governu Timor Leste, liu husi Sekretáriu Estadu Juventude no Desportu, ho fundus total 60.000 mil hodi apoiu programa akampamentu ne’e husi inísiu to’o remata, no eventu ida ne’e halo tinan rua dala ida, antes ne’e hala’o ona iha munisípiu Manatuto, Ermera, Oe-kusse ba dala haat nia ohin iha munisípiu Baucau.
Jornalista : Rita Moniz
Editór : Agapito de Deus