Lafaek News—Komisária Komisaun Nasionál eleisaun (CNE), Odete Maria Belo deklara, durante semana ida mak partidu polítiku sira la hasai materia propaganda eleitorál iha fatin publiku, CNE sei koa osan partidu nian.
Odete Maria Belo deklara asuntu ne’e hafoin iha konferénsia imprensa husi Observadores Missaun Observasaun Eleitoral Membros Órgãos Jurisdicionais Administração Eleitoral (ROJAE-CPLP) hodi ko’alia kona-ba Reportajem Observasaun Eleisaun Parlamentar tinan 2023, iha Salaun Otél Novu Turízmu Lecidere tersa( 23/05/2023).
“Semana ida mak partidu polítiku sira la hasai materia propaganda eleitorál iha fatin publiku sira mak CNE solusita ba iha PNTL atu retira, no CNE sei hanoin karik sira seida’uk hasai, parte CNE hasai maibé ami koa sira nia subsidiu ne’ebé mak iha, ne’e ami nia desizaun ne’ebé mak iha, iha munisípiu hotu-hotu”, katak Komisaria ( CNE) Odete Maria Belo ba jornalista sira.
Tanba, tuir lei eleisaun parlamentár ne’e atributu propaganda eleitorál ne’e sei retira semana ida depois de eleisaun konta husi loron ida depois de votasaun.
“Entaun eseptu ida ne’ebé mak 100 metrus besik sentru votasaun iha kampaña eleitoral hotu CNE solusita ba iha PNTL atributu ne’ebé mak besik sentru votasaun 100 metrus ne’e retira hotu kedas”.
Komisaria ne’e hateten, koa subsidiu ho porsentu hira parte CNE sei iha desizaun plenaria mak desidi.
Jornalista : Rita Moniz
Editór : Agapito de Deus
