Lafaek News—Sesta (26/03/21), Aviaun Airnorth rua (2) hatun osan operasional ba Banku Sentral Timor-Leste (BCTL) iha aeroportu Internasional Nicolau Lobato, maibé la’os Orsamentu Jerál Estadu (OJE) 2021.
Entretantu total osan ne’ebé tula husi aviaun airnorth ho marka TL903, tula osan operasional ho montante $.1978.50 mill, total saka 40 no aviaun ida segundu ho marka TL904, tula osan ho montante $.693.000 mill ho total saka 80.
Karreta rua ne’ebé tula osan operasional ne’e ba BCTL, tui-tuir malu, karreta ida uluk ho xapa matrikula 15-186-TL ho A.35-189-TL, inklui akompañia husi karreta seguransa unidade BOP.
Tuir fontes konfirmadu iha aeroportu internasionál Nicolau Lobato Komoro katak aviaun rua ne’e too aeroportu Komoro iha tuku 12:45 no aviaun daruak tuun iha oras tuku 1:30, hafoin viajen husi Amérika mai Austrália no ikus too iha Timor Leste.
“Iha aviaun airnorth primeiru hatun osan montante $.1978.50 mill no liu minutu balun aviaun segundu hatun tan osan montantate $.693.000 mill, no osan ne’e la’os OJE maibé osan ne’e ba operasional BCTL,”dehan fontes ne’e.
tuir fontes konfirmadu ne’e katak osan ne’e operasional banku sentral Timor Leste, atu atende ba situasaun emerjensia, maibe la’os OJE 2021.
Observasaun jornalista Lafaek News nota iha aeroportu Komoro nota katak autoridade seguransa husi Polísia BOP inklui karreta Banku Sentrál Timor-Leste (BCTL) ne’ebé para hela iha aeroportu Komoro hodi akompañia osan operasional ne’e ba Banku Sentral Timor Leste, bainhira too iha BCTL polísia taka portaun metin no lori direta osan ne’e ba edefisiu BCTL laran.
“Karreta tama liu ba laran, ami la konsege asesu ba laran, tanba parte seguransa taka direta portaun,” afirma jornalista Lafaek News, Orlando Magno iha BCTL.
Entretantu jornalista lafaek news ne’ebé destakadu iha Banku Sentral Timor Leste, tenta konfirmasaun ho autoridade BCTL kona-ba osan ne’e operasional ka OJE 2021, maibé parte seguransa la autoriza atu halo entrevista ho autoridade BCTL.
“Ha’u la konsege tama, tanba seguransa sira dehan husi leten la autoriza media tama halo kobertura,” katak jornalista ne’e.
Aleinde ne’e, antes ne’e iha aeroportu internasional Nicolau Lobato Komoro, situasaun hanesan iha BCTL, parte seguransa la autoriza media nasionál sira atu asesu halo kobertura kona-ba osan refere.
Ekipa : Lafaek News
Editora : Nelya Barros