Lafaek News-Permakultura Timor-Leste (PERMATIL) kria ona debu hamutuk 21 iha suku Dare, postu administrativu Vera Cruz, minisípiu Díli, atu akapta udan been labele sulin ba tasi laran.
Nune’e, bele hamoris hikas bee matan no salva udan been labele sulin hotu ba tasi, tanba sei fói impaktu ba bee matan sira iha foho leten maran no ai sai mate hotu.
Tuir Diretór PERMATIL, Eugenio Lemos, hatete, Dare hanesan fatin a’as liu entaun foti sai hanesan fatin ba akaptasaun udan been hodi bele sulin tun atu hamoris bee matan sira iha mota labele sai maran.
“Ita hakarak haree área ida-ne’e mak fatin altu husi Dare ne’ebé hanesan fatin akaptasaun udan been nian, tanba tempu udan been sulin hotu ba tasi entaun tinan-tinan ita lakon udan been, sa tan bai-loron bee matan sira mos maran no ema mos sunu rai tesi ai entaun bee sai maran hotu, rai sai krekas hotu,” dehan Diretór PERMATIL, Eugenio Lemos, iha ámbitu observasaun ba debu akaptasaun udan been, iha Dare, Sabádu (03/09/2020.
Nia haktuir, ho fatin akaptasaun hirak ne’e sei ajuda hodi hamoris fali bee matan sira iha foho leten.
“Durante ita kria fatin akaptasaun iha ne’e, ita haree iha mudansa ona, kuandu bai-loron ai sira nafatin matak rai mós bokon nafatin,” tenik Ego Lemos
Observasaun Lafaek News iha tereinu, haree iha fatin akaptasaun debu hamutuk rua nulu resin ida (21) iha suku Dare.
Jornalista : Egidio Nono
Editór : Floriano Soares
