Lafaek News—Assosiasaun Estudante Juventude Weberek, (AEJOW) konsidera Kompaiña UMABER.Lda laiha kapasidade kaer Projeitu eletrisidade liga aldeia hamutuk tolu kompostu husi Wesar, Weberek no Sarin, Suku Dotik postu administrativu Alas Munisipiu Manufahi.
Asosiasaun estudante husik postu administrativu Alas kestiona kompañia Umaber Lda, laiha kapasidade tanba kompañia refere abandona projetu instalasaun eletrisidade husi postu vila ba aldeia tolu kompostu husi aldeia Weberek, Wesar no sarin dezde 2018 too ohin ahi seidauk lakan no kompañia ne’e rasik izolan de’it iha uma.
“Kompañia refere la liu husi tenderizasaun, no kompañia ne’e laiha lisensiamentu ambiental, ka La iha Koñesementu ba komunidade dira, husi tinan ne’e kedas Kompañia ne’e tama Iha fatin refere hodi estraga Ami,” koordenadór AEJOWWSA, Jaimito Siqueira Gusmão, iha koneferénsia imprensa ba jornalista iha Faról, sesta (14/05/2021).
Koordenadór ne’e kestiona dezde 2018 too ohin kompañia ne’e dez-liga kontaktu no izola an iha uma de’it, ho razaun projetu ne’e soe iha dalan klaran ho distánsia kilu-metru 8, at liután projetu ne’e rasik laiha liu husi konkursu públiku.
Tuir nia, kompañia antes halo instalasaun liña eletrisidade ba aldeia tolu ne’e tesi ai-horis, ho valor ekonomiku hamutuk aihun 9016 la konta ai seluk ne’ebé laiha valor ekonómiku, Kompañia tesi gratuitu laiha Idiminizasaun ba komunidade sira.
“Husi tinan ne’e kedas kompañia Umaber Lda tesi ai ne’e, nia hahú abandona kedas obra ne’e to’o agora liu ona tinan tolu, ho situasaun ne’e estraga tebes komunidade sira nia fatin,”hateten koordenadór iha koneferensia imprensa ne’e.
Entretantu, númeru populasaun kompostu husi aldeia Wesar,Weberek, no Sarin, Suku Dotik postu administrativu Alas munisipiu Manufahi hamutuk uma Kain 275, Total Populasaun 1.409, mak seidauk asesu ba eletrisidade.
Jornalista : Rita Moniz
Editor : Agapito de Deus
