Lafaek News—Ministra Saúde (MS), Odete Maria Freitas Belo, informa prizoneirus hamutuk 133 inklui guarda prizional na’in-9 detetadu pozitivu covid-19, total pozitivu 143.
Odete hatoo asuntu ne’e hafoin vizita priezoneirus sira iha prizaun Bekora, sesta (14/05/2021), hafoin prizoneiru ida ho naran famozu Juga Gama (artisita) hakotu iis iha loron 13/05/2021 iha izolamentu Vera-Kruz ho sofrementu moras komplikadu inklui influénsia ho kazu covid-19.
“Kona-ba istória prizioneiru sira ne’ebé mak pozitivu ne’e sei halo hela contact tracing, sira iha laran laiha moras, maibe parte saúde koko atu haree dala ruma iha vizita ruma ka bele mós da’et liu husi guada prizional sira,tanba sira fila ba uma,” afirma Odete M.F.Belo, hafoin vizita prizaun Bekora, sesta semana.
Hodi dehan, objeitvu husi vizita ne’e atu haree direta situasaun iha prizaun Bekora tanba prizoneiru balu pozitivu ona kazu Covid-19, tan ne’e parte ministériu iha obrigasaun atu haree ho matan nune’e bele buka dalan salva prizoneirus sira seluk husi moras ne’e.
“Ami mai haree direitamente situasaun iha ne’e, tanba prizioneiru balu pozitivu ba Covid-19, ida ne’e ami nia obrigasaun atu mai haree ou tau matan ba sira ho hanoin ida katak ses husi moras Covid-19, ne’e iha mós moras seluk,” esplika ministra saúde iha okaziaun ne’e.
Parte saúde sei fó atensaun másimu ba sira ne’ebé hetan moras kamaan, asintomátiku covid-19, aliende iha tan moras seluk, liu-liu ema ne’ebé ho idade 60 ba leten, oinsá bele asegura sira husi risku.
“Provizoriamente Prizioneiru 143 mak pozitivu covid-19, no iha mós númeru balu mak sei hein hela nia rezultadu,” dehan nia.
Entretantu, teste swab ba dahuluk nian iha prizioneiru hamutuk 219, husi ne’e deteta kazu pozitivu hamutuk 133, inklui guarda prizionál na’in 9 ho totál ema na’in 143 mak pozitivu no rezultadu teste negativu hamutuk 77, balu sei hein rezultadu husi teste swab ba daruak.
Iha observasaun lafaek news iha terrenu sita katak, prizioneirus ne’ebé detetadu pozitivu covid-19, ho númeru hamutuk 143 auto izolamentu iha prizaun Bekora tanba sira nia estatutu prizioneirus.
Jornalista : Sandi Belo
Editór : Agapito de Deus
