Lafaek News- Portavoz Komisaun Internasionál Vasina Kontra (KIVK) Covid-19, Danina Coelho, Informa, iha loron 10-13 fulan Maiu 2021, Timor oan hamutuk nain 9.728 simu ona vasina 20 mil dozes ne’ebé hetan apoiu husi governu Austrália
“Ema hamutuk 9,728 mak hetan ona vasina, sira ne’e pertense ba ema tinan 60 ba leten, no ema ne’ebé moras króniku inklui pesoal liña frente sira,” dehan Portavoz, Danina ba jornalista iha MSSI Kaikoli Dili, Sesta semana.
Hodi dehan, situasaun atuál COVID-19 iha rai-laran, obriga Ministériu Saúde foti desizaun fó prioridade atu proteje lalais populasaun iha Timor-Leste, ema hotu tenke iha konsiénsia simu atu vasina hodi hamenus moras COVID-19 no moras todan sira seluk.
Danina relata, nia parte sei kontinua fó vasina ba komunidade sira iha suku Komoro, Bebonuk, Lahane Orientál, Kaikoli, no suku sira seluk iha munisípiu Dili inklui iha pasiente sira iha HNGV inklui sentru saúde sira iha Dili laran
“Iha semana ne’e, vasina hasoru COVID-19 fo ba komunidade sira iha munisipiu Dili hanesan, suku Komoro, Vera-Krús, Formosa, Bekora no Metinaru no iha suku Bebonuk, Fatuhada, Madohi, Vila-Verde, Kaikoli, Gricenfor, Lahane Orientál, Bekora no Sabuli,” relata nia.
Entretantu, Tuir planu, KIVK Covid-19, iha tempu badak, Timor-Leste sei simu no sosa tan vasina, bainhira disponivel, atu fó ba ema hotu ne’ebé tama iha lista vasina, ba ema tinan 18 ba leten atu simu vasina dala rua.
Jornalista : Sandi Belo
Editór : Agapito de Deus
