Lafaek News—Komisaun Nasionál Trabllu Infantil (KNTI) deklara labarik ho porsentu 12 halo servisu perigozu, husu governu atu elimina traballu infantil iha Timor-Leste.
Diretor Ezekutivu SEFOPE, Prezidente Komisaun Nasionál Kontra Traballu Infantil (KNTI), Aniceto Leto Soro, afirma, tinan ida ne’e hanesan tinan mundial ba eliminasaun traballu infantil iha mundu, no pais ne’ebé ratifika ona konvensaun balun kona-ba traballu infantil.
“Ami hanesan KNTI husu ba governu no mós ba parseiru sira atu servisu hamutuk hodi elimina traballu infantil iha ita nia rai laran,” dehan Diretur Ezekutivu SEFOPE no Prezidente KNTI, Aniceto Leto Soro, afirma ba jornalista iha Hudi Laran, Sesta, (14/05/2021)
Nia relata, tuir rezultadu peskiza iha 2016 hatudu atu elimina traballu infantil hamutuk rihun 442 entre labarik sira purvolta 16% halo servisu, husi numeiru ne’e 12% konsidera traballu infantil.
“Tanba ne’e máka ami apresenta ona lista no dokumentus balun ba governu, ami mós husu tulun ba governu atu nune’e bele aselera lalais hodi bele ajuda ba labarik sira ne’ebé máka ami temi ona 12% ne’ebé halo atividade servisu perigozos,” nia esplika.
Tanba ne’e komisaun nasionál kontra traballu infantil ho parseiru halo servisu makas hodi apresenta ba oitavu governu konstitusional atu bele hare’e no elemina.
Nune’e mós nia dehan, planu husi KNTI máka, aprovasaun planu no asaun nasaional kontra traballu infantil, halo analiza legal ba harmonizasaun lei idade minimu ba admisaun iha mundu traballu, aprovasaun ba kista perigoza traballu nian, aprovasaun ba enkuandramentu legal kona-ba kodigu labarik, no mós Lei protesaun ba labarik.
Entretantu, partisipa iha konferênsia imprensa ne’e mai husi parseiru revante hotu, ne’ebé servisu hamutuk iha area traballu infantile máka Komisaun Nasionál Direitu Labarik, KSTL/SJTL, CCI-TL, no Plan Internasionál.
Jornalista : Aniceto Dias
Asisten Editor : Pedro de Almeida
