Lafaeknews—Eis Komadante ein Xefe Falintil Kay Rala Xanana Gusmão, defende la fo  matebian Armindo Borges nia mate isin ba halo’ot iha Semiteriu Metinaro, tanba matebian moras fulan ida ona maka mate, la’os mate tan Covid-19, ho nune’e Ministra Saúde (MS) Odete Maria Freitas Belo, haksesuk no husu Xanana tenke fiar katak pasiente ne’e mate ba Covid-19 tanba nia familia na’in rua mos pozitivu ona

“Ha’u hein iha ne’e to’o Ambulansia mai tula mate isin ne’e, Ha’u sei la fo matebian (Armindo Borjes) ne’e atu ba hakoi iha Metinaru, tanba nia moras fulan ida ona, horseik ne’e mak hodi ba hospital sira halo teste swab dehan pasiente ne’e moras Covid-19,” dehan Xanana iha izolamentu Vera Cruz, Segunda (12/04/2021).

Lider karismatiku ne’e hatutan, se pasiente ne’e moras Covid-19 entaun ninia oan sira ne’e isin di’ak hela la iha familia ida mak pozitivu ba Covid-19

“Matebian ne’e mak imi hodi ba hakoi iha Metinaro ami sei ba ke’e fali hodi ba hakoi iha Ainaro, Ha’u mak la fiar ona depois Ha’u ba koalia ho populasaun sira ne’e sira mós la fiar ona,” tenik Xanana.

Nune’e mós informa, ekipa saúde ba kaer feto ida dehan pozitivu ba Covid-19, maibé hodi ba loron haat deit la fo aimoruk ida dehan fali nia negativu ona no haruka fila ba uma, oinsa mak ema atu fiar katak covid-19 ne’e iha.

Iha fatin hanesan, Ministra Saúde (MS) Odete Maria Freitas Belo husu Xanana atu fiar katak pasiente ne’e mate ba Covid-19

“Avo Nana tenki fiar, se Avo Nana la fiar oinsa mak ita atu kontribui ba ita nia Nasaun, no matebian (Armindo Borjes) nia familia mós iha nain 2 pozitivu ona, avo Nana tenki fiar ida ne’e,”Odete sujere.

Jornalista : Sandi Belo
Asisten Editór : Pedro de Almeida