Lafaek News—Víse Ministru Intérior (MI), António Armindo, afirma hodi rekoñese katak sapatu ka botas ne’ebé distribui ba Unidade Polísia Fronteira (UPF) la iha kualidade, tanba ne’e nia kompromete katak iha tempu badak sei haree no rezolve lalais asuntu ne’e.
Governante ne’e dehan, botas ba UPF sira iha, maibé tanba kle’ur ona konserteza aat nune’e sai difikuldade ba sira hodi servisu.
“Sapatu jatamente iha, maibé tuan ona tanba distribui kle’ur ona,” Vise MI António, relata ba LafaekNews iha resintu PN, kinta (10/12).
Membru oitavu governu afirma, alende ne’e hosi parte komandu PNTL mós iha hela hanoin atu rezolve, nune’e fasilita membru hosi UPF, UPM no UEP sira tinan oin servisu di’ak liután.
Asuntu ne’e Vise Ministru Intérior, António Armindo, hato’o hodi responde deklarasaun hosi komandante postu UPF iha fronteira Paulo Asis Belo, ne’ebé dehan komandu jerál distribui duni botas maibé la to’o kle’ur aat ona, tanba ne’e obriga sira tenki dezaraska rasik hodi sosa ba uza.
Dehan nia, tanba bainhira hato’o problema ne’e ba komandu presiza tempu kle’ur hodi sasán ka botas foun to’o fali ba sira nia fatin hodi uza.
Jornalista : Egidio da C. T. Nono
Editór : Ezequias Tomás
