Lafaek News—Mezmu suku Saburai, postu administrativu Maliana, munisípiu Bobonaro enfrenta hela problema falta eletrisidade, Ministru Obras Públika (MOP), afirma nia parte seidauk bele promete hodi rezolve lalais maibé nafatin esforsu hodi buka solusaun ba problema ne’e.
“Suku Saburai, hanesan ohin ha’u hatete. Iha 34 suku ita atu halo (dada ahi), ha’u la hatene ne’e inklui Saburai ka la’e. Ha’u labele promete atu dada hotu liña eletrisidade,” MOP Salvadór ba LafaekNews iha resintu PN, kinta (10/12).
Hatutan nia, tanba daudaun ne’e iha ona faze finál signifika katak hein dada de’it ona ahi ba fatin ne’ebé tama iha lista hodi sai prioridade.
Tanba ne’e nia haktuir hodi reforsa, dala ida tan kona-ba suku Saburai la hatene tama hotu iha lista refere ka la’e.
Dehan nia, tanba munisípiu balun ninia suku ahi bele tama ou hein dada de’it ona, mezmu iha aldeia balun mak susar eletrisidade tama (área rural), maibé governu nafatin esforsu hodi rezolve.
Subliña nia, tanba governu iha programa ida ho naran eletrisidade ba rural hodi distribui solar panel ba populasaun sira.
Asuntu ne’e Ministru Obra Públika Salvadór Soares Pires, hato’o liga-du ho problema suku Saburai, ne’ebé liuhosi autoridade lokál relata dezde ukun aan mai to’o agora seidauk asesu ba liña eletrisidade. Nune’e husu ba governu tau mós atensaun hodi dada netik eletrisidade tama ba sira nia suku.
Enkuantu suku refere iha aldeia 3 ho total uma kain 711, no populasaun hamutuk 2696.
Jornalista : Pedro de Almeida
Editór : Ezequias Tomás
