Lafaek News—Vise-Ministru Interior (V-MI), Antonio Armindo, lori VIII Governu hatoo apresiasaun no agradesimentu boot ba Organizasaun Internasional Migrasaun ne’ebé servisu hamutuk hodi desimina informasaun hodi reforsa servisu iha fronteira.
“Lori governu nia naran apresia no agradese ba enkontru ida ne’e, tanba ita deskute tema importante kona-ba jestaun fronteira, kontrolu migratoriu, tantu iha kontinente Afrika no mediu oriente, Europa no Norte Amerika rasik”, dehan Antonio Armindo iha UN Compound, Kaikoli Dili, kurta 10/02/2021.
VMI Antonio relata, objetivu Ministeriu Interior servisu hamutuk parseriu dezenvolvimentu iha Timor-Leste, ho intensaun atu promove kooperasaun hodi hadia kapasidade servisu migrasaun iha tinan balu nia laran, tanba governu halo ona esforsu fo prioridade hodi fortalese setór jestaun fronteira, maibé nafatin enfrenta dezafiu iha prosesu haforsa setór migrasaun no jestaun fronteira iha Timor-Leste.
Vice Ministru nee afirma, elementu krítiku jestaun fronteira nian maka hanesan, infraestrutura, formasaun rekursu umanu no teknolojia, partikularmente iha Sistema Informasaun Jestaun Fronteira (BMIS).
“ajente hotu ne’ebé servisu iha area fronteira hanesan guarda fronteira, migrasaun no servisu alfándega, tanba sira mak hanesan atór prinsipál sira ne’ebé responsabiliza ba jestaun movimentu ema no sasán sira,” tenik Antonio.
Nia esplika, husi istória hirak ne’e, governu entende imigrante hanesan fenómenu global ne’ebé ema hotu labele entende hodi jere maibe ida ne’e maka realidade iha sekulu 21 nia laran.
“Ami mos destina hahú deskute elementus krítika hodi halo preparasaun nesesaria ba adezaun Timor-Leste nian ba Asosiasaun Nasoens Sudeste Aziátiku, se nune’e, oinsá ita boot sira nia ideia no apoiu hodi hadia sistema jestaun fronteira,” nia hakotu.
Media Vise MI
Editora : Nelya Barros
