Lafaek News—Reuniaun Konsellu Ministru (KM), kuarta (10/02/21), aprova dekretu lei governu kona-ba krisaun Portál Munisipál ne’ebé aprezenta husi Ministru Administrasaun Estatál (MAE) no estabelese regra jerál ba funsionamentu.
Hafoin remata reuniaun Konsellu Ministru ne’e, Prezidente Konsellu Ministru, Fidelis Manuel Leite Magalhães klarifika, projetu dekretu lei ida ne’e sai ona hanesan alvu deliberasaun iha sorumutu Konsellu Ministrunian iha loron 12-fevereiru tinan 2020, maibé ho razaun introdusaun ba alterasaun substansiál sira iha faze redasaun ikus nian presiza atu submete ba iha deliberasaun foun iha KM.
“Portál munisipál importante atu ita hatuur informasaun sira ho forma permanente husi munisipiu sira nune’e bele ajuda ita nia rain ba governasaun ida dignu” informa PKM Fidelis Magalhães ba Jornalista sira iha Palasio Governu Dili, kuarta 10/02/2021.
Nia haktuir, portál munisipál konsiste iha repozitóriu permanente ida kona-ba informasaun oin-oin relasiona ho munisipiu ida-idak, ho asesu públiku no gratuitu, kontein dadus no informasaun sira kona-ba beins no servisu ne’ebé presta husi orgaun no servisu sira Administrasaun públika lokál, kona-ba investimentu públiku ne’ebé hala’o iha munisípiu ida-idak levantamentu ho estatístika oi-oin mai husi instituisaun públika oi-oin.
Jornalista : Juvita dos Santos
Editora : Nelya Barros
