Remexiu-(Lafaek News)—Sinal hatudu liu husi urat ne’ebé lia nain sira halo, iha segunda (15/02/21), iha Bora suku Asumau, postu Remexiu, munisípiu Aileu, hatudu iha Manuten debu natural Kero Ilmera sei fo moris ba bee matan hirak ne’ebé maran iha tempu bailoron.
Lia nain husi Uma lisan Maenusuk aldea Lerolisa suku Asumau, Paul Frederico Maumeta, haktuir manu ho fahi ne’ebé oho hodi haree ne’e hatudu sinal di’ak tanba manu aten no fahi urat hatudu sinal bee sei mout ba bee matan hotu liu husi debu ne’ebé konserva ona.
“Manu urat ho fahi urat ohin ne’e hatudu sinal di’ak ami fiar debu ne’e fo bee ba bee matan sira iha suku ne’e,” dehan lia nain Paul Frederico ba lafaek news iha debu Kero Ilmera, segunda (15/02/2021).
Entretantu Iha serimónia kultural ne’e, lia nain sira observa uluk debu natural ne’ebé ejiste husi beala sira ho naran Kero Ilmera la maran iha tempo bailoron, maibé iha tempu Ukun An debu ne’e maran, tan ne’e liu husi programa PERMATIL nia apoiu lian nain sira ho komunidade halo tuir fali beala sira nia ain fatin hodi hamulak no oho fahi ho manu hodi haree urat hatudu sinal debu sei moris fila-fali tanba nain ba natureza lulik beala sira hari antes fo fali dalan hodi hamoris bee ba bee matan sira iha suku Asumau.
Jornalista : Acacio Pinto
Editora : Nelya Barros
