Lafaek News—Traballador Timor oan hamutuik 43 inklui feto nain ida, sei semo ba Korea do Súl iha loron Domingu (02/07/2023), servisu iha area peskas no fábrika.
Diretor jerál Sekretaria Estadu Formasaun Professional No Empregu (SEFOPE) Paulo Alves, informa durante ne’e haruka Traballador sira ba servisu iha rai li’ur, maibé too ikus balu halai sai husi servisu ne’ebé Governu Timor halo akordu ho Governu Korea ,tan ne’e liu husi deklarasaun ne’ebé trabalhador sira jura katak ba servisu sei la halai sai husi sistema.
“Deklarasaun ida ohin sira lee ne’e hanesan juramentu ida dehan katak sira ba sei la halo no sei la halai sai husi sistema tanba ida ne’e mak ita halo ida ne’e para atu sira halo promesa ida ne’e ba família no mós Governu atu nu’une sira bele kumpri Regras sira ne’ebé mak SEFOPE hatur ba sira,” Paulo Alves ba jornalista sira iha salaun SEFOPE Kaikoli, kinta (29/06/2023).
Paulo sublina, maske nia mandatu besik remata ona, maibé hanesan Timor sempre suporta malu no apoiu malu nafatin iha parte hotu-hotu
“Maske ha’u nia mandatu hanesan Sekretaria estadu mak hotu maibé hanesan funsionario ida iha SEFOPE Rasik ha’u sei akompanha nafatin Governu foun,no ha’u sei fó hanoin nafatin atu nu’une bele tau matan ba Área ida Disputa laborais nian,” nia afirma.
Iha sorin seluk Maria Goreti hanesan mos kandidatu trabalhador Korea do Sul, haktuir nu’udar Timor-oan ne’ebé ba servisu iha Korea do súl iha area peskas nian, senti kontenti tebes,no agradese bele hetan oportunidade ida ne’e hodi bele ba servisu iha Korea do súl.
“Primeiru ha’u agradese bele hatan oportunidade ida ne’e hodi ba servisu iha Korea do súl Tuir maun ho bin sira nia Ain fatin,ida ne’e ha’u agradese tebes Tanba ha’u en nome husii feto Timor-leste lori peskas ba servisu iha Korea do súl,” Goreti espresa.
Maria Goreti mós reafirma tan katak antes nia atu ba servisu iha planu ona saida mak atu halo bainhira fila husi Korea do Súl mai Timor Leste, no servisu nia sei buka tempu hodi estuda no aprende nafatin lian Korea hodi nune’e fila mai Timor hodi loke formasaun Korea ba Timor oan sira.
Entretantu Trabalhador ne’ebe sei aranka ba servisu iha Korea do súl iha loron domingo Semana ne’e hamutuk 43 kompostu husi mane 42 no feto 1, no trabalhador nain 8 sei servisu iha area fábrika no nain 33 sei servisu iha area peskas,
Tuir dadus ne’ebé mak fo sai husi Sekretaria Estadu Formasaun profesional no empregu (SEFOPE),Katak hahu husi Tinan 2019 mai to agora husi parte SEFOPE nian haruka trabllador hamutuk 10662 mak servisu ona iha Austrália no nain 1160 mak servisu iha Korea do súl totál feto ne’ebé mak servisu iha Korea do súl hamutuk 79, no traballador ne’ebé servisu iha Korea halai sai husi 400 resin ona.
Jornalista : Felix Fernandes
Editor : Agapito de Deus