Lafaek News—Primeiru Ministru Indizitadu husi governasaun da-Sia, Kay Rala Xanana Gusmão kompromete katak governasaun foun sei hala’o servisu ho responsabilidade no pronto koopera ho entidade tomak hanesan sosiedade sivil no povu tomak hodi projeta dezenvolvimentu Timor Leste bao in.
Kay Rala Xanana Gusmão hato’o asuntu ne’e hafoin aprezenta lista membru governu foun ba Prezidente Repúblika José Ramos Horta iha palasiu prezidente Aitarak-Laran kuarta (29/06/2023) hodi simu posse iha loron 1 fulan Jullu 2023 iha palasiu prezidente.
“Serbisu ho di’ak, serbisu ho responsabilidade, la hatene sai, no koopera didi’ak ho Prezidente Repúblika, Parlamentu Nasionál, sosiedade sivil no ba ema hotu, públiku tenke akompania saida mak halo ona no saida mak seida’uk, tanba saida mak la halo, tanba saida mak seida’uk halo, tanba saida mak halo sala, halo sala hela de’it ba uma”, katak Kay Rala Xanana Gusmão atuál Primeiru Ministru indizitadu governasaun da-Sia.
Iha ámbitu aprezentasaun lista membru governu foun ne’e ba xefe estadu, no hetan rekomendasaun husi Prezidente Repúblika katak husu governasaun da-sia serbisu ho di’ak, ho responsabilidade, públiku tenke akompania serbisu hotu ne’ebé mak governu halo.
Entretantu antes ne’e Prezidente Repúblika José Ramos-Horta iha aeroportu Nicolao Lobato deklara, membru governu da-sia ne’e tenki iha esperénsia profisionál, kurikulum, tau iha fatin ne’ebé iha esperénsia duni.
“Governu ne’ebé tuir kompeténsia, haree didi’ak estuda didi’ak ema ne’e nia Kuríkulum la’ós de’it ba kurikulum akadémiku, kuriku profesionál, esperiensia, tanba ne’e mak ha’u hateten primeiru mak iha esperénsia profisionál, Segundu mak kurikulum, tau iha fatin ne’ebé nia iha esperénsia duni, labele dudu ba dudu mai fali husi nia esperiénsia”, katak Prezidente Repúblika José Ramos-Horta iha Aeroportu Nicolao Lobato hafoin fila husi vizita Xefe Estadu iha rai Alemaña kuarta (28/06/2023).
Entretantu, objetivu fundamental ba lideransa principal nain rua ba loron kuarta (29/06/2023) koalia sobre lista membru governu foun total 42 ne’ebé sei simu posse iha loron 01/07/2023.
Jornalista : Rita Moniz
Editór : Agapito de Deus
